Chusim Laef Olowe

PIPOL mas mekem staka difren kaen disison winim enitaem bifor. Olsem example, olketa kaleko iumi werem, kaikai wea iumi kaikaim, and wea nao iumi waka and ples for stap hem evritaem samting wea man chusim. Long planti ples long world, wei for chusim marit partner tu hem wanfala normal samting for duim evritaem. Bat Bible givim iumi wanfala samting wea winim evri narafala samting wea man chusim—samting wea open for evriwan.

Bible hem sei: “Wan wea hem stand strong for raeteous fasin bae kasem laef, bat wan wea aftarem badfala samting, hemseleva bae dae.” (Proverbs 11:19) And Jesus Christ tok olsem: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.”—John 17:3.

Tru nao, Creator bilong iumi givim iumi chance for chusim wanfala road wea lead go long laef olowe! Wanem nao iumi mas duim for kasem laef olowe?

Bible hem sei, “long road bilong raeteous fasin laef stap.” (Proverbs 12:28) Iumi tu savve stap midolwan olketa raeteous wan wea stap long road for kasem laef olowe. Hao? Long wei for mek sure laef bilong iumi hem fitim will bilong God and olketa komand bilong hem. (Matthew 7:13, 14) Dastawe, iumi mas chus long stretfala wei and kasem present bilong laef olowe from God.—Romans 6:23.