Waswe, Iumi Really Needim Olketa Narawan?
“TAEM iumi lukluk long laef and wei for waka hard, iumi lukim hao klosap evri samting wea iumi duim and wantem hem barava join witim wei for depend long olketa nara man,” hem nao wanem wanfala scientist wea planti savve long hem Albert Einstein talem. Hem sei moa: “Iumi kaikaim kaikai wea olketa narawan plantim, werem kaleko wea olketa narawan sewim, stap insaed olketa haos wea olketa narawan buildim. . . . Wanfala man garem olketa gudfala fasin no from samting hem seleva duim nomoa, bat from hem member bilong community, wea directim material and spiritual living bilong hem start from taem hem born go kasem taem hem dae.”
Hem wei bilong olketa animal for kaban insaed grup bilong olketa seleva. Olketa elephant savve gogo long grup and gardim gud olketa pikinini elephant. Olketa mere lion savve luk aotem kaikai tugeta and sharem witim olketa man lion. Olketa dolphin savve plei tugeta and samfala taem protectim nara animal or pipol wea swim wea needim help.
Bat, midolwan long olketa man, olketa scientist wea studyim pipol lukim wanfala fasin wea mekem olketa go ahed for wari. Olsem wanfala niuspepa long Mexico talem, samfala scientist wea studyim pipol sei “for stap seleva for planti year and wei wea community laef hem brekdaon hem barava spoelem U.S. community.” Datfala niuspepa talem tu hao “for datfala nation stap gud moa bae depend long wei for change evribit, wea minim for startim bak community laef.”
Disfala problem hem big long olketa rich kantri winim nara kantri. Wei wea planti laek for stap seleva hem kwiktaem kamap moa big. Pipol want for ‘stap seleva’ and strong for ‘protectim private laef’ and no laekem olketa narawan for poke-nose or kamap klos fren bilong olketa. Olketa sei diskaen tingting hem mekem olketa man isi for garem problem saed long feeling, sorre feeling wea no savve finis, and for suisaed.
Abaotem diswan, Dr. Daniel Goleman sei: “Wei for stap seleva—datfala idea hao man no needim eniwan for hem storyim feeling bilong hem or for garem wanfala fren—hem mekem chance for sik or dae kamap tufala taem moa big.” Wanfala report long Science magasin showimaot hao wei for stap seleva ‘savve killim dae planti pipol olsem wei for smoke, hae blood pressure, sik long heart, baonsa, and for no exercise.’
From olketa difren reason, iumi really needim olketa narawan. Iumi no savve stap seleva evribit. So hao nao iumi savve deal witim problem for stap seleva? Wanem nao givim purpose long laef bilong planti pipol? Nextfala article bae ansarem olketa kwestin hia.
[Blurb long page 3]
“Klosap evri samting wea iumi duim and wantem hem barava join witim wei for depend long olketa nara man.”—Albert Einstein