Comfort for Olketa wea Krae for Help

BIBLE hem no wanfala mentol-health buk. Nomata olsem, hem givim iumi comfort and helpem iumi for tinghae long laef nomata iumi kasem olketa trabol. Bible talem stret taem hem sei: “Man, wea born from woman, garem shortfala laef and fulap witim trabol.” (Job 14:1) Samfala trabol wea kasem iumi hem kam from iumiseleva no perfect. Bat hu nao main wan wea garem blame for wei wea man hem safa?

Bible talem hao datwan hem wanfala wicked spirit wea garem nem Devil and Satan. Hem go ahed for “giamanim olketa man long earth” and kosim planti trabol wea spoelem olketa man. Nomata olsem, Bible talem iumi tu hao shortfala taem nomoa stap for hem. (Revelation 12:9, 12) Klosap nao God bae finisim evri trabol wea Satan bringim long olketa man. Olsem Bible talem, long raeteous niu world bilong God bae no eni samting mekem iumi lus hope.—2 Peter 3:13.

Hem barava gudfala comfort for savve wei wea man safa hem for lelebet taem nomoa! Anda Long rul bilong Kingdom bilong God long heven wea Jesus Christ nao king long hem, samting wea no followim justice and wei for safa bae finis. Bible sei olsem abaotem King wea God appointim, “From hem bae sevem poor wan wea krae for help, and tu, man wea safa and eniwan wea needim help. Hem bae feel sorre for man nating and poor man, and hem bae sevem soul bilong olketa poor man. From hardfala living and raf fasin hem bae baem bak soul bilong olketa, and blood bilong olketa bae spesol long eye bilong hem.”—Psalm 72:12-14.

Taem for olketa profesi toktok hia fulfill klosap tumas. Iumi savve enjoyim laef olowe long paradaes long earth witim nambawan living hia. (Luke 23:43; John 17:3) For savve long olketa promis hia from Bible hem givim hope and comfort long olketa wea krae for help.

[Piksa Credit Line long page 32]

Girl wea feel sorre tumas: Photo ILO/J. Maillard