Wanem Kaen Nem Nao Iu Mekem for Iuseleva?
WASWE, enitaem iu readim wanfala part insaed long niuspepa wea talemaot hu nao dae and wea garem wanfala short story abaotem laef bilong hem, or wanfala longfala report wea story abaotem olketa samting wea man wea dae hem duim? Waswe, iu askem iuseleva disfala kwestin, ‘Wanem nao pipol bae talem abaotem mi?’ Haomas pipol nao savve ting raonem hao, sapos bihaen olketa dae, pipol bae rememberim olketa olsem wanem kaen man? Dastawe, hem gud for ting raonem olketa kwestin hia: Sapos iu dae yesterday wanem nao pipol bae talem abaotem iu tuday? Wanem kaen nem nao iu mekem for iuseleva? Iu laekem God and olketa wea savve long iu for rememberim iu olsem wanem kaen man?
Datfala wise man wea raetem Bible buk bilong Ecclesiastes sei olsem: “Wanfala nem hem moabeta winim gudfala oil, and day bilong dae winim day wea man hem born.” (Ecclesiastes 7:1) Why nao day wea man dae hem moabeta winim day wea hem born? Diswan hem from taem man hem born hem no mekem yet eni nem for hemseleva. Hem no garem yet wanfala record long olketa samting wea hem duim. Full laef bilong hem nao bae showimaot sapos hem mekem wanfala gud or nogud nem. Pipol wea mekem gud nem for olketa seleva for planti year finis, datfala day wea olketa dae bae hem moabeta winim day wea olketa born.
So iumiseleva nao mas chus. Tru nao, planti samting wea iumi chusim insaed evriday living hem savve affectim wei wea pipol rememberim iumi bihaen iumi dae, main wan nao wei wea God rememberim iumi. Dastawe, datfala Hebrew wise man raet olsem: “Gud nem bilong raeteous wan bae kasem blessing, bat nem bilong olketa wicked man bae rotten.” (Proverbs 10:7) For God rememberim iumi long wei for givim iumi wanfala blessing, hem wanfala nambawan privilege!
Sapos iumi wise, goal bilong iumi hem for mekem God hapi taem iumi followim olketa standard bilong hem. Diswan minim iumi mas followim olketa main principle bilong Christ olsem: “ ‘Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu.’ Diswan nao nambawan and firstfala komandment. Mek-tu hem olsem, ‘Iu mas lovem neiba bilong iu olsem iuseleva.’ Tufala komandment hia hem faondeson bilong full Law, and olketa Profet.”—Matthew 22:37-40.
Pipol rememberim samfala from olketa duim staka gudfala samting for olketa man, samfala mekhae long rights bilong pipol, or duim bigfala samting saed long bisnis, science, medicine, or olketa nara samting. Iu laekem pipol for rememberim iu olsem wanem kaen man?
Man for raetem poem, Robert Burns from Scotland, (1759-96) talem hao hem laekem God for givim iumi spesol savve for lukim iumiseleva long wei wea olketa nara pipol lukim iumi. Waswe, iu savve lukluk long honest wei long iuseleva and sei iu garem gud nem witim nara pipol and God? Really, wei wea iumi fren witim olketa narawan hem moa important winim eni samting iumi savve duim saed long sports or bisnis. So kwestin nao hem olsem: Wei wea iumi deal witim olketa narawan—long story, fasin, and akson bilong iumi—hao nao hem affectim olketa? Waswe, olketa lukim iumi olsem hem isi for olketa story witim iumi or iumi no showim eni interest long olketa? Iumi kaen or raf? Iumi willing for change sapos need kamap or barava strict? Iumi showimaot love or iumi garem wei for no laek fren, no kea and laek for separatem iumiseleva? Iumi talem toktok for daonem or for buildimap man? Iumi bae lukim samfala example from taem bifor and distaem tu for lane hao for mekem gud nem for iumiseleva.
[Piksa long page 3]
Robert Burns laekem God for givim iumi spesol savve for lukim iumiseleva long wei wea olketa nara pipol lukim iumi
[Credit Line]
From the book A History of England