Hem Lovem Kaenfala Fasin
MILTON G. HENSCHEL, wea member bilong Governing Body bilong Olketa Jehovah’s Witness for longfala taem, hem dae long Saturday, March 22, 2003. Hem 82 year.
Milton Henschel hem young man nomoa taem hem go waka long headquarter bilong Olketa Jehovah’s Witness and hem serve long faithful wei for winim 60 year. No longtaem bihaen, hem showaot klia hao hem wise, iusim gudfala tingting, and barava interest long Kingdom preaching waka. Long 1939 hem kamap secretary bilong N. H. Knorr, overseer bilong printery bilong Olketa Jehovah’s Witness long Brooklyn. Taem Brata Knorr start for lead midolwan olketa Witness evriwea long world long 1942, hem keepim Brata Henschel olsem assistant bilong hem. Brata Henschel maritim Lucille Bennett long 1956, and tufala sharem tugeta olketa hapi and hardfala samting bilong laef.
Brata Henschel barava waka klos witim Brata Knorr go kasem taem Brata Knorr dae long 1977. Brata Henschel hem travel witim Brata Knorr long winim 150 kantri, for visitim and encouragem Olketa Jehovah’s Witness raonem world, especially olketa missionary and olketa long olketa branch office. Olketa kaen gogo olsem samtaem hem hard, and hem savve barava danger tu. Long 1963, taem hem visitim wanfala convention long Liberia, Brata Henschel kasem barava raf persecution from hem no willing for tek part insaed wanfala ceremony for mekhae long kantri.a Witim wei for no fraet, samfala month bihaen datwan Brata Henschel go bak long Liberia for meetim president bilong datfala kantri and for aftarem moa freedom for worship for Olketa Jehovah’s Witness long there.
Taem hem deal witim olketa hardfala problem and challenge, Brata Henschel hem man wea savve mekem gudfala disison, willing for change, and balance. Olketa wea waka witim hem tinghae long wei wea hem followim order, no ova tumas, and hapi olowe. Hem garem barava gudfala memory, wea mekem staka missionary hapi from hem kwiktaem rememberim nem bilong olketa, and talem samfala toktok long lokol languis. Hem mekem olketa laf tu taem hem talem kleva fani toktok.
Micah 6:8 remindim iumi hao Jehovah God wantem iumi “for lovem kaenfala fasin.” Planti bae rememberim hao Brata Milton Henschel showimaot gudfala example long diswan. Nomata hem garem barava bigfala responsibility, pipol evritaem feel free for go long hem, hem isi man and kaenfala. Hem laekem tumas for sei, “Taem iu mas disaed long hao for deal witim samting, no forget hao wei for showimaot kaenfala fasin nao hem best samting for duim.” Nomata iumi sorre for lusim brata hia wea iumi lovem, iumi hapi hao hem go ahed faithful and strong go kasem taem hem dae. For sure hem bae kasem reward bilong hem, datfala “crown bilong laef.”—Revelation 2:10.
[Footnote]
a Lukim 1977 Yearbook of Jehovah’s Witnesses, page 171-7.
[Piksa long page 31]
M. G. Henschel witim N. H. Knorr
[Piksa long page 31]
Witim waef bilong hem, Lucille