Really Help for Poor Pipol
TAEM Jesus Christ, datfala Son bilong God, hem stap long earth, hem showimaot tru interest for helpem poor pipol. Wanfala man wea lukim samting wea Jesus duim hem sei olsem abaotem ministry bilong hem: “Olketa wea blind savve lukluk nao, and olketa wea cripple savve wakabaot, olketa wea garem leprosy kamap klin and olketa wea earpas savve herem samting, and olketa wea dae laef bak moa, and olketa wea poor herem gud nius wea olketa talemaot long olketa.” (Matthew 11:5) Bat, waswe long staka million poor pipol distaem? Waswe, eni gud nius hem stap for olketa? Tru nao, wanfala message bilong hope hem stap!
Nomata pipol nating tingim poor pipol and forgetim olketa, Word bilong God, Bible, promisim: “No evritaem bae olketa forgetim poor man, and hope bilong olketa wea garem kwaet fasin bae no finis.” (Psalm 9:18) Olketa toktok hia wea comfortim man bae fulfill taem Kingdom bilong God, wanfala really gavman long heven, changem evri rul bilong olketa man. (Daniel 2:44) Olsem King bilong datfala gavman long heven, Jesus “bae feel sorre for man nating and poor man, and hem bae sevem soul bilong olketa poor man. From hardfala living and raf fasin hem bae baem bak soul bilong olketa, and blood bilong olketa bae spesol long eye bilong hem.”—Psalm 72:13, 14.
Wanem kaen living nao bae stap taem Christ hem rul ovarem earth? Olketa wea stap anda world rul bilong Christ bae kasem gud samting from waka wea olketa duim. Bible sei olsem long Micah 4:3, 4: “Olketa bae sidaon, each wan anda long vine and anda long fig tree bilong hemseleva, and no eniwan bae mekem olketa seksek; from barava mouth bilong Jehovah bilong olketa army hem talem finis.” Kingdom bilong God bae stretem wei for sik and dae. (Isaiah 25:8) Datfala world bae barava difren evribit! Iumi savve bilivim olketa promis hia bilong Bible bikos olketa kam from God seleva.
Witim wei for givim message bilong hope, Bible helpem iumi tu for deal witim olketa problem wea iumi feisim evriday, olsem wei for winim fasin for no respectim seleva, wea maet wei for poor nao kosim. From wei wea hem studyim Bible, wanfala poor Christian savve hao hem barava spesol long eye bilong God long sem wei olsem wanfala Christian wea rich. Bible buk bilong Job showimaot hao God “hem no tingim bigman moa winim man nating, bikos tufala evriwan waka bilong hand bilong hem.” (Job 34:19) God lovem tufala evriwan long sem wei.—Acts 10:34, 35.