Bible Savve Helpem Marit Bilong Iu
MARIT—for samfala, disfala word mekem olketa hapi. For olketa narawan, hem givim bigfala sorre. Wanfala waef tok sorre olsem: “Mi feel olsem mi no garem hasband. Mi evritaem feel olsem hasband no kea and mi lonely.”
Wanem nao kosim tufala pipol wea promis for lovem and tinghae long each other for gogo no garem feeling for each other? Wanfala reason hem wei for no garem savve long wanem nao really insaed long marit. Wanfala man for raet saed long medical hem sei: “Iumi marit bat iumi no kasem eni training.”
Wei wea no staka distaem garem disfala savve hem showaot from wanfala research wea garem nem, The National Marriage Project, wea Rutgers University long New Jersey, U.S.A. hem organizem. Olketa man wea leadim disfala research sei: “Staka wea olketa askem long disfala research garem parents wea no hapi insaed marit or wea divorce. Olketa savve gud long wanem nao marit wea no hapi, bat no sure wanem nao gudfala marit. Only wei wea samfala savve explainim marit wea gud hem, ‘samting wea difren from parents bilong mi.’”
Waswe, olketa Christian no savve kasem problem saed long marit? Nomoa. Samfala Christian long first century needim strong kaonsel for “no luk aotem wei for lusim” marit bilong olketa. (1 Corinthians 7:27) Hem klia, marit bilong pipol wea no perfect mas garem problem samfala taem, bat iumi garem help. Olketa hasband and waef savve strongim wei wea olketa fren thru long wei for followim olketa Bible principle.
Hem tru, Bible hem no for givim evri instruction saed long marit. Bat, from Bible kam from Datwan wea startim marit arrangement, olketa principle insaed long hem fit for helpem marit. Thru long profet Isaiah, Jehovah God sei: “Mi, Jehovah, mi nao God bilong iufala, Datwan wea teachim iufala for kasem gud samting for iufala seleva, Datwan wea mekem iufala followim road wea iufala shud wakabaot long hem. O sapos iufala barava obeyim olketa komandment bilong mi! Then peace bilong iufala bae kamap olsem wanfala river, and raeteous fasin bilong iufala olsem olketa wave long sea.”—Isaiah 48:17, 18.
Waswe, love midolwan iu and marit partner bilong iu start for lus nao? Waswe, iu feel olsem iu prisoner insaed marit wea no garem love? Wanfala woman wea marit for 26 year finis hem sei: “Pain wea man kasem insaed marit olsem hem narawe. Hem no savve katdaon and hem stap evritaem.” Winim wei for acceptim nomoa wanfala marit wea no mekem iu hapi, hem bae gud for disaed strong for mekem hem kamap moabeta. Nextfala article bae showim olketa hasband and waef hao olketa Bible principle savve helpem marit bilong olketa long wanfala important wei—feeling for keepim gud marit.