Taem Olketa Promis Bae Kamap Tru

HISTORY hem fulap witim olketa promis wea no fulfill. Olketa nation planti taem fail for keepim agreement wea olketa mekem for stap klia from raoa midolwan olketa nation, and so olketa leadim pipol bilong olketa insaed war. Wanfala taem Napoleon sei olsem: “Olketa gavman savve keepim promis bilong olketa nomoa taem olketa forcem olketa for duim, or taem hem bae helpem olketa.”

Waswe long olketa promis wea olketa man wanwan mekem? Pipol savve feel nogud taem man no fulfillim promis bilong hem! Diswan hem barava tru taem hem samwan wea iu savve gud and trustim hem. Tru nao, pipol maet no fit or no willing for fulfillim promis bilong olketa.

Olketa promis bilong man hem barava difren tumas from olketa promis bilong God! Iumi fit for trustim evribit olketa promis bilong God. Eni promis wea Jehovah God mekem hem bae kamap tru. For sure hem bae fulfill. Taem hem story abaotem toktok bilong God wea no savve fail, Isaiah 55:11 hem sei: “Olsem toktok bilong mi wea go aot from mouth bilong mi bae kamap tru. Hem bae no kam bak nating long mi, bat hem bae barava duim wanem mi laekem, and hem bae barava win long wanem mi sendem hem for duim.”

So, hao nao iumi shud ting long olketa promis bilong God insaed Bible? Tru nao, iumi savve trustim olketa. Olsem example, aposol John hem raet olsem: “Lukim! Tent bilong God hem stap witim olketa man, and hem bae stap witim olketa, and olketa bae kamap pipol bilong hem. And God bae stap witim olketa. And hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.” (Revelation 21:3, 4) Iu savve kasem olketa blessing olsem sapos iu duim samting followim olketa toktok bilong Jesus: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.”—John 17:3.