“Mi Faendem Wei for Fren, Love, and for Tingim Narawan”
FROM diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.” (John 13:35) Olsem Jesus talem, love hem kamap mark bilong olketa first Christian brata and sista. Tertullian, wea raet winim wan handred year bihaen dae bilong Christ, talem hao olketa wea lukim olketa sei: ‘Lukim hao olketa lovem narawan and redy tu for dae for narawan.’
Waswe, iu savve faendem kaen love olsem long world? Yes. Tingim, for example, wanfala leta wea branch office bilong Olketa Jehovah’s Witness long Brazil kasem. Woman wea raetem kam disfala leta wea nem bilong hem Marilia, hem raet olsem:
“Taem mi stap long Villa Mercedes, Argentina, mami bilong mi wea hem wanfala Jehovah’s Witness, hem kasem sik osteoarthritis, wea mekem hem paralyze from waist bilong hem and go daon. For first eitfala month long sik bilong hem, olketa Witness long Villa Mercedes lukaftarem hem long loving and kaenfala wei. Olketa kea for evriting, klinim haos and redyim kaikai bilong hem. Nomata long hospital, evritaem long daytaem and naetaem, wanfala mas stap witim Mami.
“From datfala taem mi and Mami kam bak long Brazil, wea hem go ahed for kakamap gud from sik bilong hem. Olketa Witness long ples wea mitufala stap distaem duim evriting olketa fit for duim for helpem Mami kamap gud.”
Marília finisim leta bilong hem olsem: “For tok stret mi no wanfala Witness, bat mi faendem wei for fren, love, and for tingim narawan midolwan olketa Witness.”
Tru tumas, pipol wea garem Christian love still stap. Long wei wea olketa duim olsem, hem showimaot wanem paoa bilong teaching bilong Jesus fit for duim long laef bilong iumi.