Kwestin From Reader
Hao nao olketa Christian shud ting long wei for iusim birthstone?
Long samfala kastom, olketa birthstone hem join witim month wea man born long hem. For Christian werem wankaen spesol kala ston long wanfala ring, hemseleva nao disaedem diswan. (Galatians 6:5) Samfala important samting hem stap for tingim taem man mekem disison olsem.
Encyclopaedia Britannica sei wanfala birthstone hem wanfala “spesol kala ston wea join witim date wea man hem born, wea sapos man werem bae hem mekem man lucky or garem gudfala health.” Reference hia hem sei moa: “Olketa man wea worshipim star for savve long future sei samfala spesol kala ston garem paoa winim paoa bilong man.”
Diswan barava tru long taem bifor wea staka biliv hao birthstone savve mekem man wea werem hem lucky. Waswe, fitim wanfala tru Christian for bilivim diswan? Nomoa, from hem luksavve Jehovah tok againstim olketa wea leavim hem and trustim “god bilong Gud Luck.”—Isaiah 65:11.
Long olketa year bilong 500 CE and 1500 CE, olketa wea savve talem future markem wanfala spesol kala ston for wanfala month bilong year. Olketa encouragem pipol for werem spesol kala ston bilong month wea olketa born, mekem hem protectim olketa from eni samting wea savve spoelem olketa. Bat for olketa Christian, bae hem barava againstim Scripture for followim idea bilong pipol wea savve talem future, from Bible hem tok strong againstim pipol wea duim diswan.—Deuteronomy 18:9-12.
Hem no stret tu for wanfala Christian for joinim eni spesol mining witim wanfala ring wea garem wanfala birthstone. Olketa Jehovah’s Witness no celebratem birthday. Diswan hem from olketa kaen celebration olsem hem mekhae tumas long datfala man and olketa birthday wea Bible storyim hem only bilong olketa ruler wea no servem God.—Genesis 40:20; Matthew 14:6-10.
Samfala pipol tingse for man werem wanfala ring wea garem birthstone bae affectim fasin bilong hem. Nomata olsem, olketa tru Christian no bilivim diswan, from olketa luksavve man kasem “niufala fasin” anda long paoa bilong holy spirit bilong God and wei for followim olketa Bible principle.—Ephesians 4:22-24.
Barava important samting hem wanem nao muvim man. For disaed for werem wanfala ring wea garem birthstone, wanfala Christian maet askem hemseleva, ‘Waswe, mi laek werem disfala ring from mi lukim hem luk naes, nomata hem garem spesol kala ston wea join witim month wea mi born long hem? Or waswe, olketa idea wea followim kastom wei wea sei samfala pipol joinim go witim olketa spesol kala ston olsem nao affectim mi?’
Wanfala Christian shud lukluk gud long heart bilong hem for savve wanem nao muvim hem. Bible hem sei: “Winim eni nara samting wea iu mas protectim, protectim gud heart bilong iu, from olketa samting bilong laef kamaot from hem.” (Proverbs 4:23) For mekem disison abaotem olketa birthstone, each Christian bae kasem gud samting sapos hem lukluk gud long wanem nao muvim hem and hao diswan maet affectim hemseleva and narafala pipol.—Romans 14:13.