World wea Free From Criminal Fasin Long Future

TRAE tingim wanfala world wea no garem eni criminal! Bae iumi no needim police, prison, or olketa expensive and hard criminal justice system. Bae hem wanfala world wea evri man wanwan bae respectim laef and property bilong narafala pipol. Waswe, datwan luk olsem hem hard for kamap? Iu maet ting olsem, bat disfala nambawan change hem nao wanem Bible promisim. Hem gud for lukim wanem olketa Scripture talem abaotem criminal fasin and olketa narafala nogud samting wea go ahed long earth.

Long buk bilong Psalms, iumi read: “No showimaot iu kros bikos olketa badfala pipol stap. No jealous long olketa wea duim fasin wea no raeteous. From olsem grass, olketa bae kwiktaem dae, and olsem niufala green grass, olketa bae finis. Bat olketa wea garem kwaet fasin bae kasem earth, And olketa bae kasem nambawan hapi long bigfala peace.” (Psalm 37:1, 2, 11) Tru nao, no eniwan fit for stopem God for fulfillim disfala promis and olketa nara promis bilong hem wea barava encouragem man.

God bae mekem olketa blessing hia kamap thru long Kingdom bilong hem. Long datfala Lord’s Prea, Jesus Christ teachim olketa follower bilong hem for prea for disfala Kingdom for kam and for will bilong God for “kamap long earth, olsem long heven.” (Matthew 6:9, 10) Klosap nao, anda long datfala Kingdom, no eniwan long disfala earth bae duim criminal fasin from hem garem poor living, hardfala living, or selfish tingting. Winim datwan, Word bilong God talem: “Planti kaikai bae stap long earth; antap long olketa maunten hem bae fulap.” (Psalm 72:16) Tru tumas, Jehovah bae givimaot long evriwan wea stap long earth evri gudfala samting wea no savve finis. Winim datwan, love for God and olketa neiba nao bae muvim community bilong olketa man, and world bae free evribit from raf fasin.