Waswe, Iu Mekem Grow Feeling for Tingim Samting wea Nambawan?
WASWE, iu lukim hao olketa wea raetem Bible evritaem talemaot feeling for tingim samting wea nambawan taem olketa storyim olketa waka and fasin bilong God? Man wea raetem psalm talemaot: “Iu wakem mi long nambawan wei.” (Psalm 139:14) Profet Isaiah raet, “O Jehovah, iu nao God bilong mi. Mi apim iu, mi praisem nem bilong iu, from iu duim finis planti nambawan samting.” (Isaiah 25:1) Or tingim toktok bilong aposol Paul wea tinghae and tingim samting wea nambawan: “O riches and wisdom and savve bilong God hem deep tumas!”—Romans 11:33.
The Oxford Encyclopedic English Dictionary minim “feeling for tingim samting wea nambawan” olsem “wanfala hapi feeling long wanem iu no expectim, iu no savve long hem, or iu no savve explainim, especially wei for sapraes taem iu tinghae or barava interest for savve.”
Hem barava hapi samting for lukim olketa smol pikinini openem eye bilong olketa big witim wei for sapraes taem olketa lukim, feelim, or herem samting wea niu long olketa. Sorre tumas, taem man kakamap olo, kaen tingting olsem wea kam from wei for interest long olketa difren and niu samting hem gogo daon tu.
Nomata olsem, olketa man wea raetem Bible wea iumi just talem toktok bilong olketa, disfala feeling for tinghae hem samting wea stap deep insaed olketa. Hem stap strong long olketa. Why nao olsem? Olketa mekem grow feeling bilong olketa for tingim samting wea nambawan taem olketa ting raonem witim hapi feeling olketa waka bilong God. Man wea raetem psalm prea olsem: “Mi tingim olketa year bifor, tingting bilong mi stap long evri samting wea iu duim, evri nambawan samting long creation bilong iu fulimap mind bilong mi.”—Psalm 143:5, The New English Bible.
Hem barava gud tumas for lukim olketa worshiper bilong God distaem garem disfala sem feeling for tingim samting wea nambawan! Waswe, iu garem? Iu mekem hem grow?