Waswe, God Kea Long Iumi?

WASWE, iuseleva go ahed for stragol witim hevi saed long feeling wea kam from famili problem, health, waka, or narafala hevi responsibility? Staka pipol kasem datwan. And hu nao savve sei wei for no followim justice, criminal fasin, and raf fasin no affectim hem? Tru nao, olsem Bible talem: “Evri creation go ahed for krae tugeta and feel pain kam kasem distaem.” (Romans 8:22) Dastawe iumi no sapraes taem planti pipol ask: ‘Waswe, God hem kea? Waswe, bae hem helpem iumi?’

Wise King Solomon prea olsem long God: “Iuseleva nomoa savve gud long heart bilong olketa man.” Solomon barava sure hao God no savve nomoa abaotem iumi bat hem kea long iumi wanwan tu. Hem fit for askem God for “herem long heven” and for ansarem prea bilong man wea fraet long God, wea talem long God “trabol and pain bilong hemseleva.”—2 Chronicles 6:29, 30.

Distaem, Jehovah God still kea long iumi and invaetem iumi for askem hem long prea. (Psalm 50:15) Hem promis for duim samting fitim prea wea kam from heart wea fitim will bilong hem. (Psalm 55:16, 22; Luke 11:5-13; 2 Corinthians 4:7) Tru tumas, “nomata wanem prea, nomata wanem help eni man or evri pipol bilong hem askem,” Jehovah bae herem. Dastawe, sapos iumi putim trust bilong iumi long God, askem help thru long prea, and kam klos long hem, iumi bae feelim loving kea and help bilong hem. (Proverbs 3:5, 6) James hem promisim iumi: “Kam klos long God, and hem bae kam klos long iufala.”—James 4:8.