Kwestin From Reader
Wanem nao happen long datfala story wea Exodus 4:24-26 storyim, and laef bilong hu nao stap long danger?
Taem Moses gogo long Egypt witim waef bilong hem Zipporah and tufala son bilong hem Gershom and Eliezer, disfala samting nao hem happen: “Bihaen, Jehovah hem meetim long road, long ples wea olketa rest and hem go ahed for luk aotem wei for killim hem dae. Gogo, Zipporah tekem wanfala sharp ston and katem aotsaed skin bilong private part bilong son bilong hem and mekem for tasim leg bilong hem and sei: ‘Hem from iu wanfala man wea bae marit bilong blood long mi.’ From diswan Jehovah letem hem go. Long datfala taem Zipporah sei olsem: ‘Wanfala man wea bae marit bilong blood,’ from disfala wei for circumcise.” (Exodus 4:20, 24-26) Nomata disfala Scripture no mas klia and iumi hard for talem really mining bilong hem, olketa Scripture helpem iumi lelebet for minim olketa verse hia.
Disfala story no talem klia laef bilong hu nao stap long danger. Bat, iumi no fit for sei hem Moses, from God just komandim Moses for leadim olketa Israelite aot from Egypt. (Exodus 3:10) Hem travel go for fulfillim datfala assignment so iumi no fit for sei angel bilong God laek killim hem dae long taem olsem. So, hem masbi laef bilong wanfala long tufala son bilong hem. Abraham kasem finis wanfala law saed long wei for circumcise wea sei: “Wanfala man wea no circumcise wea bae no katem aotsaed skin bilong private part bilong hem, datfala soul tu iufala mas killim dae. Hem brekem covenant bilong mi.” (Genesis 17:14) Luk olsem Moses no circumcisem son bilong hem, and so angel bilong Jehovah go for killim dae son hia.
Taem Zipporah trae for stretem problem long wei for katem aotsaed skin bilong private part bilong son bilong hem, datfala skin hem tasim leg bilong hu? Hem datfala angel bilong Jehovah wea garem paoa for killim dae datfala son wea no circumcise. So, iumi fit for sei Zipporah mekem datfala skin wea hem katemaot for foldaon long leg bilong angel for pruvim long datfala angel hao hem obeyim covenant.
Wanem nao disfala toktok bilong Zipporah, “iu wanfala man wea bae marit bilong blood long mi,” hem showimaot abaotem Zipporah? Wei wea hem obeyim law bilong covenant saed long wei for circumcise, showimaot hem ting long hemseleva olsem hem insaed datfala covenant witim Jehovah. Datfala Law covenant wea bihaen Jehovah mekem witim olketa Israelite showaot for insaed wanfala covenant witim Jehovah hem olsem Jehovah hem hasband and olketa wea insaed nao olsem waef. (Jeremiah 31:32) So, wei wea Zipporah tok for Jehovah (thru angel wea stand for hem) olsem “wanfala man wea bae marit bilong blood,” minim hem showimaot hem stap anda long olketa mark bilong datfala covenant. Hem olsem Zipporah acceptim position bilong waef and Jehovah God olsem hasband, long datfala covenant for circumcise. Nomata wanem, from Zipporah kwiktaem duim samting for obeyim mark bilong God, laef bilong son bilong hem no stap long danger nao.