666​—No Hard Tumas for Minim

“No eniwan savve baem or sellim eni samting bat only man wea garem disfala mark, hem nao nem bilong wild animal or namba bilong nem bilong hem. Samting wea important long hia nao wisdom: Letem eniwan wea garem gudfala tingting kaontem namba bilong wild animal, from diswan hem namba bilong wanfala man; and namba bilong hem nao six handred and sixti-six.”​—⁠Revelation 13:​17, 18.

WANFALA Bible topic wea pipol interest tumas long hem nao hem profesi abaotem datfala mark, or nem, bilong datfala “wild animal”​—⁠datfala namba 666. Long television, Internet, olketa movie, buk, and magasin, olketa givim enikaen mining for mark bilong datfala animal.

Samfala biliv 666 hem mark bilong antichrist wea Bible story abaotem. Olketa narawan sei hem wanfala mark, olsem tattoo, wea markem man olsem servant bilong datfala animal. Samfala moa biliv 666 hem mark bilong pope bilong Catholic religion. Olketa iusim wanfala teknik wea changem olketa leta long title bilong pope, Vicarius Filii Dei (Vicar bilong Son bilong God), for kamap namba and gogo hem kasem namba 666. Samfala pipol sei tu hao datfala namba kamap tu long nem bilong Roman Emperor Diocletian and long Hebrew nem bilong Nero Caesar.a

Bat, olketa mekap wei for minim disfala namba hem difren tumas from wanem Bible talem abaotem mark bilong animal, olsem iumi bae lukim long next article. Wanem Bible talem nao hem wei wea pipol wea garem datfala mark bae feelim kros bilong God taem hem distroem disfala system. (Revelation 14:​9-​11; 19:20) So, hem barava important for kasem really mining bilong 666. Iumi hapi from Jehovah God, wea hem nao love and Datwan wea Givim spiritual laet, no haedem mining bilong disfala important samting from olketa servant bilong hem.​—⁠2 Timothy 3:​16; 1 John 1:5; 4:⁠8.

[Footnote]