Witim Help From Bible, Hem Againstim Temptation

Long world distaem temptation kamap big tumas. So, hem barava hard for keepim olketa standard bilong Bible. Olsem example, hem maet wanfala challenge for obeyim disfala kaonsel bilong Bible: “Ranawe from fornication.”—1 Corinthians 6:18.

Wanfala Jehovah’s Witness, wea bae iumi kolem Sebastian, hem waka for wanfala Scandinavian company long Poland. Hem mas barava waka hard for keepim faithful fasin bilong hem.

Olketa long wakples bilong hem savve Sebastian hem wanfala Jehovah’s Witness. From olketa boss bilong hem tinghae long wei wea hem evritaem waka hard and garem gudfala fasin, olketa givim hem olketa difren kaen waka for hem duim. Bat, wei for kasem moa waka olsem minim hem mas go long olketa bisnis meeting wea insaed garem dirty hapitaem.

From datwan, Sebastian start for garem olketa daot. “Boss bilong mi savve mi wanfala Jehovah’s Witness. Hem nao why hem trustim mi and depend long mi. Sapos mi no willing for tekpart, bae mi lusim waka bilong mi wea mi bin hard waka for kasem. Waswe sapos mi go lukluk nomoa?”

Bat Sebastian faendaot moa samting abaotem wanem nao hem mas duim. Waka bilong hem nao for stretem olketa girl for olketa bisnisman wea visit kam from nara ples. Wanem nao bae hem duim?

Sebastian disaed for talem moa boss bilong hem abaotem tingting bilong hem from Bible saed long dirty fasin. Hem start for luksavve hao datfala waka no fitim hem and gogo bae hem mas lusim. Hem kasem wanfala niu waka wea pei bilong hem no big tumas bat wea free from temptation for duim dirty fasin. Distaem hem garem klinfala conscience.

Wanem nao bae iu duim sapos eniwan forcem iu for share or for acceptim dirty fasin? Waswe, bae iu willing for change kwiktaem? Hem nao samting wea Joseph duim bifor, olsem Genesis 39:7-12 storyim.