Waswe, Iu Kasem Strong From Word Bilong God?
TAEM iu feisim olketa challenge, hao nao iu deal witim olketa? Long example bilong Jesus, taem hem feisim olketa challenge bilong Satan, hem rememberim wanfala scripture wea fitim and datwan helpem hem. (Matthew 4:1-11) Olsem tu, taem King David feisim olketa test, hem kasem strong from Word bilong God. Hem sei: “Taem planti tingting for wari kamap insaed long mi, olketa toktok bilong iu for givim comfort nao lukaftarem soul bilong mi.”—Psalm 94:19.
Long sem wei, for rememberim wanfala favorite scripture savve comfortim or strongim iumi taem iumi feisim olketa challenge. Olsem example, Rex, wea distaem hem 89 year, hem serve full-taem for preach start kam long 1931. Nomata olsem, hem sei: “Planti taem mi savve feel mi no fit taem mi kasem wanfala spesol assignment long ministry.” Hao nao hem deal witim datwan? “Mi rememberim favorite scripture bilong mi long Proverbs 3:5, wea sei: ‘Trustim Jehovah witim full heart bilong iu and no depend long savve bilong iuseleva.’ For rememberim and followim disfala scripture helpem mi win for duim olketa assignment bilong mi.”
Nomata olketa young wan tu kasem gud samting long wei for garem wanfala favorite scripture. Jack wea six year old sei favorite scripture bilong hem nao Matthew 24:14. Disfala scripture muvim hem for go preach witim parents bilong hem. Hem sei: “Mi laek go preach evri Saturday witim mami, dadi and sista bilong mi.”
Olsem Jesus, waswe, samfala taem iu feisim olketa challenge long faith bilong iu? Sapos olsem, Philippians 4:13 savve kamap wanfala favorite scripture bilong iu. Waswe, iu safa from “planti tingting for wari” olsem King David? Sapos olsem, for rememberim Philippians 4:6, 7 maet helpem iu for deal witim datwan. Waswe, samfala taem iu ting service bilong iu for Jehovah hem iusles nomoa? Sapos olsem, for rememberim 1 Corinthians 15:58 bae strongim iu.
Taem iumi baeheartim olketa scripture wea fitim iumi, iumi letem Word bilong God strongim iumi. (Hebrews 4:12) Olketa scripture olsem savve comfortim and strongim iumi.—Romans 15:4.