Olketa Man Luk Aotem Wei for Mekem God Hapi

“LONG full history bilong man, God hem barava important part long living bilong evri difren kaen pipol long earth, planti taem olketa biliv hem nao wakem or kontrolem full universe. Diswan hem barava tru nomata long pipol wea chus for no biliv long God and wea separatem politik and religion.” John Bowker talem datwan long buk bilong hem God—A Brief History. Long olketa difren wei, wei for luk aotem God and for laek mekem hem hapi hem wanfala part long fasin bilong man. Evriwea raonem world, planti pipol garem feeling for barava laek mekem God hapi. Bat, wei wea olketa trae for duim diswan hem followim wanem olketa bilivim.

Samfala ting only samting iumi mas duim for mekem God hapi hem for garem living wea klin and stret. Samfala tingse bae olketa fit for mekem God acceptim olketa taem olketa givim samting long poor pipol. And tu, samting wea important long planti million pipol hem olketa ceremony and kastom saed long religion.

Long narasaed, samfala tingse olketa no fit for kam klos long God—hem barava farawe or hem barava busy and no garem taem for tingim olketa man nating. Olketa sei, wanfala savveman bilong Greece bifor Epicurus, hem bilivim hao ‘olketa god barava farawe dastawe olketa no duim eni samting for olketa man. Nomata olsem, planti wea gogo long church nao garem kaen tingting olsem. Maet samfala offerim tu olketa sakrifaes and duim samfala kastom ceremony for mekem olketa laen dadi bilong olketa wea dae finis hapi.

Wanem nao tingting bilong iu? Waswe, God really lukim wei wea iumi trae hard for mekem hem hapi? Waswe, samting wea iumi duim savve affectim feeling bilong God and mekem hem hapi?

[Picture Credit Line long page 2]

COVER: Courtesy of ROE/Anglo-Australian Observatory, photograph by David Malin