Hao for Laef Longtaem and Hapi
SAMFALA pipol sei man laek for laef longtaem bat no laek olo. Planti pipol wea gogo for kasem age wea man bae stop for waka luk forward for garem moa taem for relax and no garem staka responsibility. Bat, olketa fraet for stap nating and iusles. Olketa fraetem tu wei for stap seleva, no hapi, and health wea gogo daon.
Wanem nao key for kasem hapi laef? Olketa gud fren and wanfala loving famili savve help for mekem olketa olo and olketa young wan for hapi. Bat wanem narafala pipol duim for olketa olo hem no barava important. Samting wea important nao hem wanem datfala olo savve duim for narafala pipol.
Wanfala research wea go ahed for longfala taem long 423 olo pipol wea marit showimaot hao “wei for helpem narafala pipol savve mekem man laef longtaem.” Stephanie Brown, wea duim datfala research, talem olsem: “Samting wea datfala research faendemaot hem hao no samting wea iumi kasem from narawan nao mekem iumi kasem gud samting, bat wanem iumi givim long narawan nao mekem iumi kasem gud samting.” Insaed datkaen wei for give hem maet for helpem narawan witim waka long haos, lukaftarem olketa pikinini, duim samting for narawan, provaedem transport, or lisin long samwan wea laek for storyim feeling bilong hem.
Samting olsem 2,000 year go finis, Jesus Christ sei: “Moa hapi kamaot from wei for give winim wei for kasem.” (Acts 20:35) For laef longtaem and hapi no depend long big selen wea man sevem long bank or exercise for man stap young or for man markem hao hem kaikai. Bat, hem depend long wei for go ahed busy and givim taem and strong bilong iumi for mekem laef bilong nara pipol kamap moabeta.
Nomata olsem, datwan bae no stopem iumi from wei for olo, sik, and dae. Kingdom bilong God nomoa bae finisim olketa samting olsem. Anda long rul bilong hem, sik bae nomoa and “dae bae nomoa” tu. (Revelation 21:3, 4; Isaiah 33:24) Tru nao, olketa man wea obey bae stap hapi for olowe long paradaes earth. (Luke 23:43) Olketa Jehovah’s Witness hapi for talem nara pipol disfala instruction wea kam from Bible for laef longtaem and hapi.