Duim Gud Samting Long Taem Need Kamap
“IUMI shud duim gud samting long evriwan, bat main wan nao long olketa wea garem sem faith olsem iumi,” hem nao wanem aposol Paul encouragem iumi for duim. (Galatians 6:10) Olketa Jehovah’s Witness evriwea long world traem best for followim datfala principle long living bilong olketa, for duim gud samting long evriwan, especially long olketa Christian brata bilong olketa. Hem samting wea happen evritaem need kamap. Iumi lukim olketa example wea kamap long thrifala kantri no longtaem go nomoa.
Long December 2002, wanfala big cyclone wea garem wind wea winim 300 kilometer insaed wan hour, barava spoelem Guam. Hem spoelem and distroem evribit samfala haos. Olketa kongregeson long there kwiktaem organizem olketa brata for helpem olketa Witness famili wea cyclone barava spoelem olketa. Branch long Guam givim olketa material and olketa wakman for repairim olketa haos wea nogud, and branch long Hawaii help kam tu. Bihaen tu-thri week, wanfala grup bilong olketa carpenter kam from Hawaii for help saed long building waka. Samfala brata holiday from waka bilong olketa and iusim taem hia for helpem datfala grup. Wei for hapi for waka gud tugeta hem wanfala witness for evriwan long community.
Long wanfala area aotsaed long taon bilong Mandalay, Myanmar, fire start for bone klosap long ples wea wanfala Kingdom Hall stap. Haos bilong wanfala inactive sista and famili bilong hem stap klosap long datfala Kingdom Hall. Wind blowim fire stret for haos bilong hem, so hem ran go long Kingdom Hall for askem help. Long datfala taem olketa fixim datfala Kingdom Hall, so staka brata nao stap. Olketa seke for lukim datfala sista bikos olketa nating savve hem stap long datfala area. Olketa brata kwiktaem help for muvim olketa samting bilong datfala famili long sef ples. Taem hasband bilong woman hia wea no wanfala Witness, herem nius abaotem datfala fire, hem kwiktaem go long haos and lukim olketa brata kea for famili bilong hem. Hem barava tinghae and thankiu, and hapi tu bikos kaen taem olsem olketa man for steal savve stealim olketa samting. Wei wea olketa brata hia showimaot kaenfala fasin muvim disfala sista and son bilong hem for kaban moa witim Christian kongregeson, and distaem tufala attendim evri meeting.
Long service year wea go pas finis, planti long Mozambique no garem kaikai from drae season wea kasem olketa and wei wea kaikai hem nogud samfala taem. Branch office bilong Olketa Jehovah’s Witness kwiktaem duim samting for provaedem kaikai for olketa wea barava needim kaikai. Olketa givimaot kaikai long olketa Kingdom Hall, samfala taem bihaen olketa kongregeson meeting. Wanfala singol mami wea hem wanfala sista sei: “Taem mi kam long olketa meeting mi sorre, mi no savve wanem bae olketa pikinini bilong mi kaikaim taem mi kasem bak haos.” Wei wea olketa brata provaedem loving help olsem barava encouragem hem. Hem sei: “Disfala samting hem olsem mi laef bak moa!”
Long spiritual wei tu olketa Witness “duim gud samting” long wei for sharem message bilong comfort and hope from Bible. Olketa biliv olsem datfala wise man bilong bifor kam: “Saed long man wea lisin long mi, hem bae stap sef and no fraetem bigfala trabol.”—Proverbs 1:33.
[Olketa Piksa long page 31]
1, 2. Givimaot kaikai long olketa wea garem need long Mozambique
3, 4. Cyclone long Guam distroem staka haos
[Olketa Credit Line]
Child, left: Andrea Booher/FEMA News Photo; woman, above: AP Photo/Pacific Daily News, Masako Watanabe