Waswe, God Mekem Olketa Problem Bilong Iumi Kamap?

TAEM full-grown dota bilong Marion barava sik from brain bilong hem garekil, Marion duim samting wea planti long iumi bae duim tu.a Hem prea long God for helpem hem. Marion sei: “Long datfala taem, winim enitaem bifor, mi nating savve wanem for duim and mi feel no eniwan stap for helpem mi.” Bihaen, dota bilong hem kamap moa worse, and Marion start for daotem God. Hem ask: “Why nao diswan hem happen?” Hem no minim why nao wanfala God wea lovem and tingim hem bae nating helpem hem.

Hem no Marion seleva wea kasem diskaen samting. Planti pipol evriwea long world feel olsem God nating helpem olketa taem olketa kasem hard taem. “Mi stragol yet for minim diskaen kwestin, ‘why nao God letem kaen samting olsem for happen?’” Hem nao wanem Lisa talem bihaen samwan killim dae granson bilong hem. “Mi no lusim faith long God evribit, bat diswan mekem faith bilong mi kamap wik.” Long sem wei tu, wanfala woman tok olsem bihaen baby son bilong hem dae: “Mi nating kasem comfort from God saed long diswan. Hem nating showim hem tingim mi or sorre long mi.” Hem sei tu: “Mi bae nating forgivim God.”

Olketa narawan barava kros tumas long God taem olketa lukim olketa samting wea happen long world. Olketa lukim olketa kantri wea fulap witim pipol wea poor, hangre, olketa refugee wea ranawe from war, planti pikinini wea dadi and mami bilong olketa dae from AIDS, and planti million pipol wea safa from olketa narakaen sik. Taem olketa samting olsem happen, planti savve blamem God bikos olketa tingse hem no duim eniting for help.

Bat tru samting nao, God no mekem olketa problem wea kasem olketa man. For tok stret, olketa gudfala reason stap for biliv hao God bae klosap stretem olketa nogud samting wea kasem olketa man. Mifala invaetem iu for tan go long next article and lukim hao God really tingim iumi.

[Footnote]