Wanfala Leta for Noah

“DEAR Noah, mi read abaotem iu planti taem insaed Bible and hao iu buildim wanfala ark wea iu and famili bilong iu stap sef insaed long taem bilong Flood.”

Hem nao hao Minnamaria, wanfala girl wea 15 year, startim wanfala leta wea hem givim long wanfala raeting competition for olketa student wea age bilong olketa hem 14 year go kasem 21 year. Postal services bilong Finland witim Federation for Finnish Mother Tongue Teachers, and Finnish Literature Society nao arrangem disfala competition. Olketa wea tekpart mas raetem wanfala leta wea idea for hem kam from wanfala buk. Olketa savve raetem go datfala leta long man wea raetem buk or samwan wea buk story abaotem. Olketa teacher chusim winim 1,400 leta bilong olketa student and givim long olketa wea bae judgem disfala competiton. Then olketa chusim wanfala wea kam first long evriwan, then tenfala wea kam second and tenfala wea kam third. Minnamaria barava hapi from leta bilong hem insaed grup wea kam third.

Why nao Minnamaria, wanfala student wea teenager, raetem go leta long Noah, man wea stap samting olsem 5,000 year go finis? Hem sei olsem: “First samting wea mi tingim hem Bible. Mi barava savve gud abaotem pipol wea Bible storyim. Mi readim staka samting abaotem olketa and olketa barava real long mi. Mi chusim Noah bikos laef bilong hem barava interesting and difren from laef bilong mi.”

Minnamaria endim leta bilong hem for Noah witim olketa toktok hia: “Iu still wanfala example bilong faith and wei for obey. Laef bilong iu barava encouragem evriwan wea readim Bible for duim samting followim faith bilong olketa.”

Disfala leta bilong disfala young wan wea readim Bible hem showimaot hao Bible barava “laef and garem paoa” wea affectim pipol, olketa young wan and olo evriwan.—Hebrews 4:12.