“Mifala Laek for Sei, ‘Ia!’ ”

NO LONGTAEM go nomoa, branch office bilong Olketa Jehovah’s Witness long Nigeria kasem wanfala leta wea lelebet part bilong hem sei olsem:

“Son bilong mifala, Anderson, hem dae taem hem 14 year. Bifor hem dae hem keepim tufala kokorako. Hem laek for sellim olketa and then sendem selen long branch office olsem contribution for preaching waka wea kamap evriwea long world. Bat bifor hem savve sellim olketa kokorako, hem dae.

“From diswan nao samting wea hem laek for duim, mifala, parents bilong hem, keepim olketa kokorako and sellim. Selen wea mifala sendem long iufala hem nao contribution bilong Anderson. Mifala barava sure from promis bilong Jehovah hao klosap—barava klosap nao—mifala bae lukim Anderson moa. Mifala laek for sei, ‘Ia mifala duim!’ taem hem askem mifala sapos mifala duim samting wea hem barava laekem. Tru nao, mifala luk forward long taem wea mifala bae lukim Anderson and tu, wanfala ‘bigfala sekson bilong olketa witness’ wea bae resurrect.”—Hebrews 12:1; John 5:28, 29.

Olsem disfala leta showimaot klia, wei for biliv long resurrection hope hem strongim olketa tru Christian. Planti million famili, olsem famili bilong Anderson, bae hapi tumas for welkamim bak pipol wea olketa lovem wea dae!—1 Corinthians 15:24-26.

Word bilong God storyim disfala hope bilong resurrection wea givim comfort olsem wanfala long olketa nambawan samting wea bae klosap for happen long raeteous niu world anda long Kingdom bilong God. (2 Peter 3:13) Bible story olsem abaotem wanem God bae duim for pipol long datfala taem: “Hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.”—Revelation 21:4.