“Hem Nao Best Samting wea Iu Savve Duim”

ALEXIS hem wanfala boy wea faev year wea stap long taon bilong Morelia, Mexico. Parents bilong hem studyim Bible and attendim olketa meeting bilong Olketa Jehovah’s Witness. Wantaem taem hem attendim wanfala circuit assembly witim famili bilong hem, Alexis lukim wanfala demonstration abaotem wei for preach from haos tu haos. Seknomoa, hem tan go long dadi bilong hem and askem, “Dadi, Dadi, why nao iu nating go aot and preach?” Dadi bilong hem sei, “Mi go ahed for study yet mekem bae mi savve duim datwan.” Alexis hapi tumas and sei, “Dadi, hem nao best samting wea iu savve duim.”

Disfala smol pikinini luksavve hao hem important for hem duim samting followim savve wea hem garem abaotem Jehovah. From samfala smol kasin bilong hem stap long sem haos witim hem, hem prea firstaem long Jehovah and then hem storyim long olketa samting wea parents bilong hem teachim hem from Bible Story Buk Bilong Mi. Nomata Alexis nating savve hao for read, hem savve gud long disfala buk from olketa piksa long olketa story. Hem talem tu hao hem laek for visitim pipol long haos bilong olketa for talem olketa samting wea hem lanem abaotem olketa purpose bilong God.

Tru nao, olketa young wan and olo savve changem laef bilong olketa for fitim samting wea Jehovah, disfala “Holy Wan,” hem laekem olketa for duim, and from diswan, garem privilege for witness abaotem hem long olketa difren kantri. (Isaiah 43:3; Matthew 21:16) Iumi sure, hem nao best samting wea eniwan savve duim.