Hao for Deal Witim Wei for Wikdaon
WASWE, iu wikdaon? Samfala pipol kamap olsem long disfala taem wea fulap witim daot and trabol. Wei wea samfala no kasem waka for selen mekem olketa wikdaon. Samfala pipol mas deal witim nogud samting wea kamaot from wanfala accident. Samfala moa mas go ahed for stragol witim olketa famili problem, wanfala big sik, or garem feeling hao no eni wan kea.
Wea nao iu savve luk aotem help sapos iu wikdaon? Staka pipol evriwea long world kasem comfort from wei for readim Word bilong God, Bible. Toktok bilong aposol Paul mekem olketa kasem strong moa, taem hem sei: “Thankiu long God and Dadi bilong Lord bilong iumi Jesus Christ, Dadi bilong olketa kaenfala mercy and God bilong evri comfort, wea hem savve comfortim iumi long evri trabol bilong iumi.” (2 Corinthians 1:3, 4) Waswe sapos iu readim disfala scripture and samfala nara Bible verse long Bible bilong iuseleva? ‘Bae heart bilong iu kasem comfort and kamap strong’ taem iu duim olsem.—2 Thessalonians 2:17.
Help for deal witim wei for wikdaon hem stap tu long wei for kaban witim olketa wea servem Jehovah. Proverbs 12:25 sei olsem: “Wari wea stap insaed heart bilong man bae mekem heart wikdaon, bat gudfala toktok nao bae mekem heart hapi.” Taem iumi attendim olketa Christian meeting, iumi herem datfala “gudfala toktok,” wea hem “swit long soul and healim olketa bon.” (Proverbs 16:24) Waswe sapos iu attendim eni meeting long eni Kingdom Hall bilong Olketa Jehovah’s Witness mekem iu savve lukim seleva hao kaen hipap olsem savve strongim iu?
Gud samting wea savve kamaot from prea tu savve helpem iu. Sapos wari bilong laef mekem bigfala hevi long iu, storyim full feeling bilong iu long “Datwan wea Herem prea.” (Psalm 65:2) Jehovah God, wan wea wakem iumi, hem savve tumas long iumi winim wei wea iumi savve long iumiseleva. Iumi savve depend long help bilong hem. Word bilong hem promisim iumi olsem: “Torowem hevi bilong iu long Jehovah, and hem nao bae strongim iu. No wei bilong hem for letem raeteous wan for foldaon.” (Psalm 55:22) No eni daot stap, “olketa wea hope long Jehovah bae strong bak moa.”—Isaiah 40:31.
Jehovah God givim iumi finis evri samting for helpem iumi deal witim wei for wikdaon. Waswe, bae iu iusim olketa help hia?