Kwestin From Reader
Why nao olketa man long Israel savve maritim woman from nara ples wea prisoner nomata Law Bilong Moses komandim olketa for no arrangem marit witim pipol bilong nara ples?—Deuteronomy 7:1-3; 21:10, 11.
Samfala important samting hem join witim wei wea diswan fit for happen. Jehovah talem Israel for finisim evribit olketa taon bilong sevenfala nation long land bilong Canaan and for killim dae evri pipol wea stap long olketa taon hia. (Deuteronomy 20:15-18) Saed long olketa nara nation, luk olsem only pipol wea stap laef nao olketa young girl wea olketa tekem olsem prisoner. (Numbers 31:17, 18; Deuteronomy 20:14) Eni man bilong Israel fit for maritim kaen woman olsem, bat only sapos disfala woman hem duim samfala samting.
Bible sei olsem abaotem olketa samting wea kaen woman olsem mas duim: “Distaem hem mas shavem hair long hed bilong hem and katem evri finger nail bilong hem, and aotem kaleko wea hem werem taem olketa tekem hem for kamap prisoner and stap insaed haos bilong iu and sorre for dadi and mami bilong hem for wan full month, and bihaen datwan iu shud sleep witim hem, and iu mas tekem hem and hem mas kamap waef bilong iu.”—Deuteronomy 21:12, 13.
Girl wea stap olsem prisoner wea man long Israel laek for maritim mas shavem evri hair long hed bilong hem. Wei for shavem hair hem showimaot man hem sorre. (Isaiah 3:24) Wanfala example, hem taem Job lusim evri pikinini and evri samting bilong hem, hem showimaot hem sorre long wei wea hem katem aot hair long hed bilong hem. (Job 1:20) Datfala woman from nara ples mas katem evri finger nail bilong hem tu, maet ‘katem short’ mekem nomata olketa paintim, tufala hand bilong hem no luk naes tumas. (Deuteronomy 21:12, Knox) Wanem nao “kaleko wea hem werem taem olketa tekem hem for kamap prisoner” wea woman hia mas aotem? Hem kastom bilong olketa woman long olketa heathen taon for werem barava naes kaleko taem olketa klosap for lus long faet. Olketa tingse bae enemy bilong olketa laekem olketa from naes kaleko wea olketa werem. Woman wea prisoner and sorre mas no werem kaen kaleko olsem.
Woman wea prisoner wea bae kamap waef bilong wanfala man long Israel mas showimaot hem sorre for wan full month for olketa relative bilong hem wea dae finis. No eni relative or famili bilong hem stap moa bikos olketa taon wea lus mas barava finis evribit. Olketa samting bilong hem for worship bae nomoa nao bikos olketa soldia bilong Israel finisim evribit evri image bilong olketa god bilong hem. Datfala month for sorre hem wanfala taem for woman wea stap olsem prisoner for klinim hemseleva and kamap free from evri wei bilong religion bilong hem bifor.
For saed bilong evri nara woman bilong nara ples, diswan hem difren. Principle saed long diswan hem olsem: “Iu mas no arrangem marit witim olketa. Iu mas no givim dota bilong iu for son bilong hem, and dota bilong hem iu mas no tekem for son bilong iu.” (Deuteronomy 7:3) Why nao diswan hem tambu? Deuteronomy 7:4 sei olsem: “From hem bae tanem son bilong iu for no followim mi, and olketa bae servem olketa nara god.” So datfala tambu, hem for protectim olketa bilong Israel from olketa giaman religion. Bat kaen woman wea Deuteronomy 21:10-13 storyim bae no kamap danger for olketa Israelite. Evri relative bilong hem dae finis, olketa image wea stand for god bilong hem no stap nao. No eniwan wea worship long giaman religion stap moa for hem kaban witim. Wanfala Israelite savve maritim kaen woman olsem.