Report Bilong Olketa wea Talemaot Kingdom
Wanfala Leta From Alejandra
For longtaem nao wanfala gud wei for witness hem for raet leta. Nomata samfala taem man no sure wanem bae happen, olketa wea go ahed for iusim disfala teknik kasem bigfala blessing. Olketa rememberim disfala wise kaonsel long Bible: “Long morning plantim seed bilong iu and go kasem evening no letem hand bilong iu for rest; from iu no savve wea nao bae iu win, maet long hia or there, or bae hem gud sapos tufala evriwan.”—Ecclesiastes 11:6.
Alejandra, wanfala young Witness wea bin waka long branch office bilong Olketa Jehovah’s Witness long Mexico for samting olsem ten year, hem kasem wankaen treatment for cancer wea olketa kolem chemotherapy. Bat gogo, sik bilong hem kamap moa big, and hem wiki fogud for duim olketa samting wea hem savve duim evriday. Nomata olsem, hem no laek katdaon long ministry bilong hem, so Alejandra disaed for raet leta. Hem raet abaotem free Bible study arrangement and givim telephone namba bilong mami bilong hem. Then hem givim olketa leta hia long mami bilong hem for putim long haos bilong pipol wea no stap taem hem duim preaching waka.
Long datfala semtaem, Diojany, wanfala young girl from Guatemala, go waka olsem haos girl long Cancún, Mexico. Taem hem long there, hem meetim Olketa Jehovah’s Witness and hapi for story witim olketa long Bible. No longtaem bihaen, hasband and waef wea hem waka for tufala disaed for muv go long Mexico City, and tufala laek tekem hem go witim tufala. Diojany no laek for muv bikos diswan minim hem bae no story moa witim olketa Witness.
Hasband and waef hia encouragem hem olsem: “Iu no wari, olketa Witness stap evriwea. Taem iumi kasem long there, bae mitufala luk aotem olketa.” From hem luk forward long datwan, Diojany agree for go witim tufala. Taem olketa long Mexico City, tufala luk aotem olketa Witness. Tufala traem bat tufala no savve faendem olketa Witness, nomata datfala taon garem winim 41,000 Witness and 730 kongregeson.
Gogo, Diojany start feel sorre bikos hem no savve faendem olketa Witness for startim bak story bilong olketa long Bible. Wanday, misis wea hem waka for hem sei olsem long hem: “Iu savve! God bilong iu herem olketa prea bilong iu nao.” Then hem givim hem wanfala leta and sei: “Olketa Witness leavim disfala leta for iu.” Hem wanfala leta from Alejandra.
Diojany ringim mami and sista bilong Alejandra, Blanca, and agree for studyim Bible. Tu-thri week bihaen, hem meetim Alejandra and tufala hapi tumas for lukim each other. Alejandra encouragem hem for go ahed strong for studyim Bible mekem hem savve muv ahed long spiritual wei.
Tu-thri month bihaen, long July 2003, Alejandra hem dae. Hem showimaot nambawan example saed long faith and wei for no fraet for olketa Christian brata and sista. Long taem olketa berem hem, toktok wea Diojany talem hem affectim staka wea meetim hem taem hem sei: “Alejandra and famili bilong hem showimaot nambawan example long mi. Mi disaed strong for servem Jehovah and mi no laek delay for baptaes. Mi luk forward tumas for lukim moa Alejandra long Paradaes long future!”
Tru nao, maet wanfala leta hem smol samting nomoa. Bat gud samting wea kamaot from diswan savve go ahed for longfala taem!