Plei Hem Important

WEI bilong pikinini hem for plei. Bat, “diswan hem no iusles,” datfala buk The Developing Child sei. “Hem luk olsem hem nao samting wea help for mekem tingting bilong pikinini for grow.” Taem pikinini plei, hem bae lane for iusim tingting bilong hem, savve long evri samting wea stap raonem hem, and deal witim narawan.

Olketa pikinini actim waka bilong olketa big man, start taem olketa foa or faev year. Wantaem Jesus tok abaot olketa pikinini wea plei. Samfala laek for plei “marit,” samfala moa plei “man dae,” and olsem olketa pikinini duim evritaem, olketa raoa bikos samfala no laek for tekpart. (Matthew 11:16, 17) Kaen plei olsem savve putim gud samting insaed mind bilong pikinini wea go ahed for grow.

Olketa pikinini insaed tufala piksa hia actim Bible study. Hem no tru Bible study, bat idea for sharem message bilong Bible hem stap insaed mind bilong olketa. Diswan hem wanfala important leson, bikos Jesus komandim evri follower bilong hem for mek disaepol and teachim pipol for duim evri samting hem teachim olketa.—Matthew 28:19, 20.

Olketa dadi and mami wea pikinini bilong olketa actim Bible study, givim olketa tok, or preach long haos tu haos, fit for feel happy abaotem training wea olketa givim. Hem wei bilong pikinini for duim samting followim samting wea olketa lukim big man hem duim. Plei bilong olketa pikinini from Bible hem showimaot olketa kasem “kaen training and kaonsel wea Lord appruvim.”—Ephesians 6:4, Charles B. Williams.

Jehovah laekem pikinini for tekpart insaed tru worship. Hem talem Moses “olketa smol pikinini” mas stap tu long taem for readim Law. (Deuteronomy 31:12) Sapos tru worship hem part long laef bilong pikinini, bae hem showaot long plei bilong olketa. And pikinini wea laek plei preaching or Bible study hem duim samting wea bae lead go for kamap wanfala minister bilong God.