Waswe, Enitaem Bae Iumi Feel Sef Evribit?

Hu nao bae les for lukluk long olketa pikinini wea hapi for plei witim mami and dadi wea barava lovem olketa? Olketa pikinini olsem no garem wari or feel fraet bikos mami and dadi barava kea for olketa. Nomata olsem, staka pikinini hard for kasem kaen hapitaem olsem. Samfala wari evriday for faendem ples for sleep. Waswe, eni hope stap for olketa pikinini olsem, and for pipol wea no stap sef?

Nomata future luk olsem no wei nao, hope hem stap insaed Bible. Profet Isaiah talemaot hao evriwan bae stap sef evribit. Hem raet olsem: “Olketa bae buildim haos and stap insaed; and olketa bae plantim grape plantation and kaikaim frut bilong hem. Olketa bae no build and narafala man nao stap insaed; olketa bae no plant and narawan nao kaikaim.”—Isaiah 65:21, 22.

Bat waswe, disfala hope fit for kamap tru? For tok stret, “hope” hem no samting wea savve kamap tru evritaem. Dastawe, pipol long Brazil garem disfala toktok, “Hope hem last samting for dae,” wea minim pipol garem hope nomata no eni reason stap for garem. Nomata olsem, hope wea iumi kasem from God hem difren. Aposol Paul raet olsem: “No eni wan wea putim faith long [God] bae feel sorre.” (Romans 10:11) Olketa profesi bilong Bible wea happen finis, strongim trust bilong iumi hao evri promis bilong God bae kamap tru. Taem diswan happen, olketa samting wea mekem pikinini no garem ples for stap bae finis.

Nomata distaem, kaonsel bilong Bible savve helpem olketa wea no garem hope, for mekem laef bilong olketa kamap gud and feel sef. Hao nao man fit for kasem diswan? Olketa Jehovah’s Witness wea stap long ples bilong iu bae hapi for helpem iu kasem ansa bilong kwestin hia.