‘Hapi Long Training wea Mi Kasem’

WANFALA competion saed long wei for tok long English kamap long Hokkaido, wea hem nao big island long north Japan. Disfala competition hem for evri hae skul long datfala island. Wanfala young girl wea nem bilong hem Kazuna, barava seke fogud taem teacher bilong hem talem idea for hem nao bae tekpart long datfala competition. No eni wan long skul bilong hem tekpart long kaen competition olsem bifor. Kazuna fraet fogud long day bilong datfala competition, bikos samting olsem 50 student nao tekpart insaed. Tufala judge wea English nao languis bilong tufala wea stap long there barava mekem hem fraet go moa.

Taem for tekem prize, firstaem, olketa kolem nem bilong man wea kam last. Gogo taem olketa kolem nem bilong Kazuna for kasem first prize, hem barava seke fogud. Kazuna and teacher bilong hem wea tufala sidaon tugeta lukluk long each other and barava sapraes fogud. Kazuna gohed for seksek taem hem go long stage and tekem prize bilong hem!

“Samting wea mekem mi fit for duim diswan nao hem training wea organization bilong Jehovah provaedem thru long Theocratic Ministry Skul. Mi barava hapi long training wea mi kasem.” Theocratic Ministry Skul, wea Kazuna tekpart insaed from taem hem smol, hem wanfala long olketa meeting bilong Olketa Jehovah’s Witness. For mek redi for competition, Kazuna lisin and lukluk gud long hao for iusim microphone, story long wei for showimaot feeling and interest, duim akson witim hand, lukluk long pipol, and samfala subject moa wea savve kamap insaed long Theocratic Ministry Skul.

Mifala invaetem iu for kam long disfala skul wea kamap evri week long Kingdom Hall bilong Olketa Jehovah’s Witness, mekem iuseleva lukim hao olketa young wan and olo kasem gud samting from datwan. Eniwan nomoa savve kam long disfala meeting. Plis askem Olketa Jehovah’s Witness wea stap long ples bilong iu for eniting moa iu laek for savve abaotem disfala skul.