Taem for Kaikai Hem No for Kaikai Nomoa!

EVRIWAN hapi for kaikai. Long taem for kaikai, wei for sidaon tugeta witim olketa wea iu lovem and for story gud tugeta, bae kamap wanfala taem for hapi winim wei for fulimap bele nomoa. Hem wei bilong staka famili for evriwan long famili mas kaikai tugeta wan or maet winim wanfala taem evriday. Long taem for kaikai olsem, hem givim chance for famili story tugeta abaotem olketa plan and samting wea happen insaed datfala day. Olketa mami and dadi wea lisin long wanem pikinini talem savve minim feeling and tingting bilong pikinini. Gogo, datfala hapitaem tugeta wea kamap long taem for kaikai bae mekem famili for feel sef, evriwan trustim narawan, and garem love wea strongim full famili.

Distaem, samfala famili no garem taem for kaikai tugeta bikos samfala member long famili busy tumas. Samfala ples long world, kastom nao stopem famili for kaikai tugeta or for story long taem bilong kaikai. Samfala famili spoelem gudfala wei for story tugeta long taem for kaikai, long wei for lukluk long television.

Nomata olsem, olketa Christian mami and dadi redi evritaem for eni chance for buildimap famili bilong olketa. (Proverbs 24:27) Longfala taem bifor, God talem olketa mami and dadi hao wanfala best chance olketa savve garem for story witim olketa pikinini abaotem word bilong God hem ‘taem wea olketa sidaon tugeta long haos.’ (Deuteronomy 6:7) For hipap tugeta evritaem for kaikai, givim mami and dadi nambawan chance for mekem grow love for Jehovah and olketa raeteous principle bilong hem insaed heart bilong olketa pikinini. For mekem grow wei for evriwan hapi and feel gud long taem for kaikai, bae mekem evriwan enjoyim and strongim famili tu. So, mekem taem for kaikai no taem for fulimap bele nomoa!