“Wanem Nao Mekem Iu Win?”

LONG wanfala ples for kaikai, Muriel, wanfala mami wea garem thrifala pikinini, sapraes taem wanfala olo man wea hem no savve long hem askem hem datfala kwestin antap. From Muriel tekem olketa pikinini for lukim doctor, hem barava leit nao. Olketa no garem taem for go bak long haos for kaikai firstaem bifor olketa attendim Christian meeting. So hem and olketa pikinini go long wanfala ples for kaikai wea stap klosap, mekem olketa kaikai and go long meeting.

Taem olketa klosap finis kaikai, datfala olo man kam long Muriel and sei long hem: “Start taem iufala kam insaed, mi lukluk long evriting iufala duim. And mi lukim olketa pikinini bilong iu barava difren from olketa nara pikinini. Olketa nara pikinini savve spoelem olketa chair and tebol, putim leg antap long tebol and muvim olobaot olketa chair. Bat olketa pikinini bilong iu stap kwaet and showimaot gudfala fasin. Wanem nao mekem iu win?”

Muriel sei olsem: “Mi and hasband bilong mi evritaem studyim Bible witim olketa pikinini bilong mitufala, and mifala trae for followim wanem mifala lanem. Mifala Olketa Jehovah’s Witness.” Then nomoa man hia sei: “Mi wanfala Jew wea stap laef bihaen Holocaust. Mi rememberim mi lukim pipol persecutim Olketa Jehovah’s Witness long Germany. Nomata long datfala taem, pipol luksavve hao olketa difren. Mi barava tinghae long fasin bilong olketa pikinini bilong iu. Mi mas lukluk gud moa long religion bilong iu.”

Bible hem wanfala nambawan buk wea garem instruction for trainim olketa pikinini. Olketa Jehovah’s Witness barava interest for helpem pipol kasem gud samting from instruction wea stap insaed Bible. Mifala hapi for encouragem iu for duim diswan.