Hu Nao Bae Feedim World?

WANFALA organization bilong United Nations, disfala World Food Programme, wea againstim wei for hangre, talem hao hangre klosap for killim dae samting olsem 800 million pipol, planti long olketa hem pikinini. No longtaem go nomoa, datfala organization sei planti kantri wea garem selen and savve no iusim diswan for againstim disfala problem, bat olketa iusim long olketa samting olsem wei for againstim terrorism. Olketa sik wea isi for pas go long narawan mekem disfala problem kamap moa big. Wanfala report from disfala organization, Global School Feeding Report, talem olsem abaotem olketa kantri long Africa wea AIDS kamap big tumas: “Klosap evri parents olketa dae finis. Olketa pikinini bilong olketa no savve hao for keepim olketa seleva. Planti pikinini no garem savve for wakem garden kaikai and hao for deal witim laef, wea parents nao shud lanem long olketa.”

Disfala World Food Programme trae for feedim olketa pikinini wantaem evriday long skul. Disfala idea hem no for daonem nomoa hangre, bat tu, for lanem olketa young wan thru long olketa nara program hao for stap klia long HIV/AIDS.

Long olketa ples wea disfala program hem kamap, olketa pikinini kasem kaikai, training for stap klin, and olketa nara help. Olketa faendem tu hao long olketa ples wea pipol changem fasin bilong olketa, namba bilong pipol wea garem HIV/AIDS hem go daon.

Bat sorre tumas, help wea olketa man trae for givim hem no savve finisim olketa problem for olowe. Nomata olsem, iumi kasem comfort bikos Bible promisim hao problem bilong hangre bae finis for olowe. Psalm 72:16 sei: “Staka kaikai bae stap long earth.” Pipol wea stap anda long Kingdom bilong God bae tok olsem abaotem Jehovah God: “Iu tanem interest bilong iu kam long earth, mekem iu givim staka samting long hem . . . Iu preparem kaikai bilong olketa, from hem nao wei wea iu preparem earth.”—Psalm 65:9.

[Piksa Credit Line long page 32]

WFP/Y. Yuge