Jesus Affectim Pipol Evriwea
MAN for transleitim Bible, Edgar Goodspeed, raet olsem: “Evri samting wea olketa gospel sei Jesus hem talem, taem olketa disaepol nomoa stap and taem staka pipol stap, hem savve talem nomoa insaed tufala hour. Nomata olsem, samting Jesus teachim muvim pipol long barava bigfala wei. Dastawe staka pipol agree hao no eni nara man affectim olketa man long wei olsem.”
Taem Jesus Christ finis for duim waka bilong hem long earth long 33 C.E., hem garem winim 120 man and woman wea disaepol bilong hem. (Acts 1:15) Distaem, winim tu billion pipol sei olketa Christian. Staka handred million moa luksavve long Jesus olsem wanfala profet. Tru nao, olketa samting Jesus teachim hem barava affectim olketa man.
Nomata olketa leader wea no bilong Christian religion, olketa tu talemaot hao Jesus affectim pipol evriwea. Olsem example, Hyman Enelow, wanfala Jew bigman, hem raet olsem: “Jesus hem man wea staka pipol savve long hem, study abaotem hem, and wea important winim eni nara man long history bilong religion bilong olketa man.” Enelow sei tu: “Wei wea Jesus affectim olketa man hem barava narawe. Love wea hem mekem pipol feelim, comfort wea hem givim, olketa gud samting wea hem duim, hope and hapi wea hem mekem kamap—evri samting hia no eniwan long history bilong olketa man hem duim. Nomata staka gud and important man stap long history, no eniwan long olketa garem barava bigfala paoa for muvim pipol olsem Jesus, and tu, wea pipol evriwea laekem hem. Winim eni nara man, hem man wea pipol interest tumas long hem.” And Mohandas K. Gandhi, leader bilong Hindu religion, hem sei: “Mi no savve long eni nara man wea duim staka samting for olketa man winim Jesus. For tok stret, Christian Wei hem gud.” Bat, hem sei tu: “Iufala Christian nao nogud. Iufala nating duim nomoa wanem iufala teachim.”
For longtaem finis olketa kantri wea sei olketa Christian fail for duim wanem Jesus teachim. Man for raetem history abaotem Christian Wei, Cecil John Cadoux hem sei: “Nomata long . . . year 140 A.D. . . bat olketa bigman bilong Church luksavve finis hao fasin bilong pipol long Church hem isisi gogo daon.” Hem sei tu: “From fasin bilong olketa gogo daon olsem, gogo wei bilong olketa kamap olsem pipol wea no Christian nao.”
Disfala wei wea fasin gogo daon hem kamap big long mek-foa century taem Emperor bilong Rome, Constantine, hem acceptim Christian Wei. Cadoux raet olsem: “Olketa man for raetem history luksavve and samfala feel nogud tumas hao long bigfala wei Church no faithful from hem saedem Constantinus.” Insaed plande handred year start kam long datfala taem, pipol wea sei olketa Christian duim staka barava nogud samting wea no honorim nem bilong Christ.
Olketa kwestin wea iumi laek savve long ansa bilong olketa, hem olsem: Wanem nao Jesus really teachim? And hao nao olketa samting wea hem teachim shud affectim iumi?
[Piksa long page 3]
“Mi no savve long eni nara man wea duim staka samting for olketa man winim Jesus.”—Mohandas K. Gandhi
[Piksa long page 3]
“No eni nara man affectim olketa man long wei olsem.”—Edgar Goodspeed
[Credit Line]
Culver Pictures