Lukaftarem Need Long Macedonia
“MUV kam long Macedonia and helpem mifala.” (Acts 16:9) Datfala toktok bilong wanfala man wea aposol Paul lukim long vision, hem showimaot need stap for talemaot gud nius abaotem kingdom bilong God long wanfala niu territory. Olketa taon hia stap distaem long kantri bilong Greece.
Sapos iumi markem Olketa Jehovah’s Witness long Macedonia distaem witim population bilong datfala kantri, bae hem wanfala Witness for 1,840 pipol. Plande long olketa nating herem eni samting abaotem Jehovah God. Tru nao, bigfala need stap for pipol long Macedonia for herem message bilong peace.—Matthew 24:14.
God openem wei for lukaftarem datfala need. Long November 2003, office bilong Olketa Jehovah’s Witness long wanfala taon wea nem bilong hem Skopje, long Macedonia, sapraes for kasem wanfala telephone kol. Olketa long Macedonian Center for International Cooperation nao ring kam, and olketa invaetem olketa Witness for garem wanfala stall mekem olketa savve minim biliv bilong olketa long show wea bae gohed for thrifala day start long November 20. Hem barava nambawan chance for plande thousand pipol for herem gud nius abaotem Kingdom!
Olketa Witness busy for redim and putim long there olketa difren Bible buk bilong Olketa Jehovah’s Witness wea stap long Macedonian languis. Olketa putim aot samfala buk for olketa pipol for kam lukim, mekem sapos olketa laekem, olketa savve tekem. Diswan givim chance for plande pipol kasem free spiritual wata wea savve strongim olketa.—Revelation 22:17.
Pipol wea kam laekem tumas olketa buk wea savve helpem olketa, olsem, Questions Young People Ask—Answers That Work and Secret for Kasem Hapi Famili.a Naenti-eit pipol givim address and askem Olketa Jehovah’s Witness for go visitim olketa. Plande talem gud samting abaotem gudfala waka bilong Olketa Jehovah’s Witness and wei wea olketa buk bilong olketa hem barava gud.
Wanfala dadi hem holem hand bilong smol boy bilong hem and tufala kam long datfala stall. Dadi hia ask sapos eni buk for olketa smol pikinini hem stap. Olketa Witness showim hem datfala buk, Bible Story Buk Bilong Mi.b Hem openem and lukluk insaed, and barava laek for savve haomas nao kost bilong hem. Taem hem herem hao education waka bilong Olketa Jehovah’s Witness hem kasem sapot thru long donation nomoa, diswan mekem hem hapi go moa. (Matthew 10:8) Hem showim buk hia long son bilong hem and sei: “Buk hia barava naes tumas! Dadi bae readim wanfala story insaed for iu evriday!”
Wanfala professor hem kam long datfala stall. Hem barava interest long religion, especially long biliv bilong Olketa Jehovah’s Witness. Taem hem lukluk insaed long datfala buk Mankind’s Search for God,c datfala teacher hem sei: “Information insaed disfala buk hem barava klia! Hem barava kasem tingting bilong mi.” Bihaen, samfala student from skul bilong hem kam and ask for datfala sem buk wea datfala teacher tekem. Olketa laek for studyim sem buk. Olketa tingse hem bae iusim information hia taem hem teach long skul.
Datfala stall hem fastaem for samfala pipol readim and herem olketa truth from Bible. Wanfala grup bilong olketa teenager wea earpas kam for lukluk. Wanfala Witness story long olketa for lelebet taem, and wanfala gele iusim saen languis for minim go long olketa. Hem iusim olketa piksa insaed buk, Nambawan Man wea Winim Evri Otherfela Man,d and hem explainim hao Jesus healim olketa didifren kaen sik, nomata olketa wea earpas tu. Olketa barava hapi tumas for lanem promis long Bible hao Jesus klosap for duim sem samting for pipol wea stap long earth distaem. Staka long olketa hapi tumas for tekem olketa Bible buk, and olketa arrange for samfala Witness wea savve long saen languis for visitim olketa.
Witim olketa buk wea stap long Macedonian languis, olketa garem tu Albanian, Turkish, and English languis. Wanfala man hem no savve long Macedonian languis so hem askem olketa for olketa English buk. Taem olketa givim hem olketa Wastaoa and Awake! magasin, hem talem hao hem savve long Turkish languis. Hem barava sapraes tumas taem hem lukim olketa buk long languis bilong hem! Hem luksavve hao Olketa Jehovah’s Witness laek for helpem evriwan.
Long datfala taem olketa barava givim gudfala witness, and samting wea barava encouragem olketa nao, hem hao staka pipol interest long Bible truth! Tru tumas, Jehovah openem wei for talemaot gud nius bilong Kingdom long Macedonia.
[Footnote]
a Olketa Jehovah’s Witness nao pablisim evri buk hia.
b Olketa Jehovah’s Witness nao pablisim evri buk hia.
c Olketa Jehovah’s Witness nao pablisim evri buk hia.
d Olketa Jehovah’s Witness nao pablisim evri buk hia.
Box/Olketa Piksa long page 9]
IMPORTANT SAMTING WEA KAMAP!
Long May 17, 2003, wanfala samting kamap wea barava mekem gud nius abaotem Kingdom bilong God long Macedonia hem muv ahed. Long Skopje, olketa dedicatem wanfala niu office bilong Olketa Jehovah’s Witness. Waka for buildim olketa niu office hia hem gohed for tufala year and olketa mekem olketa niu office hia fofala taem moa big winim bifor.
Thrifala difren building stap, wea insaed hem administration and olketa transleison office and tu, olketa rum for sleep, kitchen, and ples for wasim kaleko. Wanfala member bilong Governing Body bilong Olketa Jehovah’s Witness, Guy Pierce, nao kam for givim dedication tok. Olketa visitor kam from tenfala difren kantri for attendim datfala dedication program. Evriwan barava hapi tumas for lukim olketa niufala building hia wea barava luk naes tumas.
[Map long page 8, 9]
(For formatted text, lukim pablikeson)
BULGARIA
MACEDONIA
Skopje
ALBANIA
GREECE
[Picture on page 8]
Skopje, Macedonia