History Bilong Bible​—Waswe, Hem Stret Evribit?

INSAED buk Battles of the Bible bilong Chaim Herzog, president bilong Israel bifor, and Mordechai Gichon, professor bilong archaeology long Tel Aviv University wea retire, hem talem disfala toktok:

“Information insaed Bible abaotem hao olketa army long datfala taem faet. . . hem no mekap story wea pipol raetem bihaen olketa happen. For pruvim diswan iumi savve markem war bilong Gideon againstim olketa Midianite and olketa wea sapotim olketa, wea stap long Judges, 6-8, witim olketa faet insaed Trojan War, wea Homer storyim insaed Iliad poem bilong hem. Long datfala poem, hem no talem klia nem bilong eni saedsea or eni taon wea olketa faet long hem. . . . Bat story insaed Bible abaotem faet bilong Gideon hem barava difren. Wei wea Bible talem plande information abaotem hao olketa faet and abaotem lukluk bilong olketa ples insaed 60 kilometer wea tufala sekson hia faet, hem barava klia tumas . . . From diswan, iumi kanduit denyim hao information insaed Bible abaotem olketa faet olsem hem barava tru.”

Iu savve study abaotem disfala faet bilong Gideon taem iu iusim map long page 18 and 19 long brochure, “See the Good Land.”a Story hem start taem “evriwan bilong Midian and Amalek and olketa from East hipap tugeta olsem wanfala sekson and go and camp long flat ples bilong Jezreel.” Gideon invaetem olketa tribe wea stap klosap for helpem hem. Evri samting hia hem happen start long datfala well bilong Harod go kasem hill bilong Moreh, then go daon insaed Jordan Valley. Bihaen hem ronem olketa enemy akrosim Jordan River, Gideon winim olketa.—Judges 6:33–8:12.

Datfala map insaed brochure, “See the Good Land,” hem showim olketa main ples and lukluk bilong datfala land wea olketa faet long hem. Nara map (page 15) showim olketa ples bilong olketa tribe bilong Israel. Tufala map hia savve helpem iu for luksavve disfala story from Bible hem tru.

Diswan strongim samting wea Professor Yohanan Aharoni wea dae finis hem talem: “Insaed datfala land wea Bible storyim, lukluk bilong olketa ples and history, tufala barava join tugeta, dastawe hem hard for minim gud wanfala long tufala sapos iu no garem information abaotem narawan.”

[Footnote]

[Piksa Credit Line long page 32]

Background map: Based on maps copyrighted by Pictorial Archive (Near Eastern History) Est. and Survey of Israel