Sorre Samting wea Seknomoa Happen

OWEN, wanfala smol boy wea tu-and-haf year, hem plei long ples for swim insaed long haos bilong hem. Gogo, hem klaemap kasem wanfala cupboard, wea dadi and mami putim olketa medicine insaed from olketa tingse hem no savve kasem. Insaed datfala cupboard, hem lukim wanfala botol wea luk naes long hem. Hem openem and hem drinkim. Seknomoa sorre samting happen.

Insaed datfala botol hem acid, and Owen hem dae nao. Dadi and mami bilong hem barava sorre tumas. Dadi bilong hem, Percy, laek kasem comfort so hem go askem bigman bilong church bilong hem: “Why nao diswan happen?” Bigman bilong church ansa olsem, “God laekem nara smol angel long heven.” Dadi hia barava feel nogud and konfius, and long tingting bilong hem diswan barava no followim justice. Waswe, God really plan for sorre samting olsem for happen? Percy no hapi long lotu bilong hem and hem disaed for no join witim olketa moa.

Taem Percy ting raonem samting wea happen hem ask: ‘Waswe, boy bilong mi feel pain yet distaem? Waswe, bae mi lukim hem moa?’

Maet iu tu laek savve wanem nao happen taem man dae, and waswe, bae iumi fit for stap moa witim olketa long future? Word bilong God, Bible, hem savve ansarem olketa kwestin hia. Bible storyim olketa kliafala ansa wea savve givim comfort for evriwan wea kasem olketa sorre samting olsem. And tu, hem talem samting wea important winim datwan. Hem talem iumi abaotem wanfala nambawan samting wea God promis for duim long future, hem nao for resurrectim pipol.

Plis readim next article for lanem moa samting abaotem disfala nambawan hope.