Iu Build Antap Long Wanem Samting?

WANFALA building hem strong only sapos hem garem gudfala faondeson. Samfala taem Bible storyim diswan long tokpiksa wei.

Olsem example, profet Isaiah story abaotem Jehovah God olsem Datwan wea “leim faondeson bilong earth.” (Isaiah 51:13) Disfala tokpiksa faondeson stand for olketa law bilong God wea no savve change wea kontrolem gogo bilong earth, and mekem hem stap long ples bilong hem. (Psalm 104:5) Word bilong God, Bible, story tu abaotem “olketa faondeson” long living bilong olketa man. Olketa hia nao justice, law, and wei for followim order. Taem diswan “brekdaon,” or kamap wik thru long wei wea no followim justice, raverave fasin, and raf fasin, living bilong olketa man hem olobaot.—Psalm 11:2-6; Proverbs 29:4.

Diswan fitim tu saed long man wanwan. Taem hem finisim Sermon Long Maunten, Jesus Christ sei: “Eniwan wea herem toktok bilong mi and duim, hem olsem wanfala wise man, wea buildim haos bilong hem antap long bigfala ston. And rain hem foldaon and flood hem kamap and wind hem blow strong and bangam haos, bat hem no foldaon, from hem buildim antap long bigfala ston. And tu, eniwan wea herem toktok bilong mi and no duim, hem olsem wanfala krangge man, wea buildim haos bilong hem long sandbis. And rain hem foldaon and flood hem kamap and wind hem blow strong and bangam haos and hem foldaon, and hem nogud evribit.”—Matthew 7:24-27.

Iu buildim laef bilong iu antap long wanem samting? Waswe, iu build antap long idea bilong olketa man wea no biliv long God, wea olsem sandbis and wea isi for foldaon? Or waswe, iu build antap long wei for obeyim toktok bilong Jesus Christ, wea olsem bigfala ston wea bae helpem iu for stap sef long olketa hard taem wea kamap long laef?