Waswe, Iu Story Witim Famili Bilong Iu?

WANFALA magasin long Poland, Polityka, hem sei: “Wei bilong iumi for story witim famili hem gogo for nomoa nao.” Long United States, plande hasband and waef story abaotem olketa important samting for six minute nomoa insaed wanday. Samfala savveman tingse haf long evri marit wea separate and divorce hem kamap from diswan.

Waswe long wei wea olketa parents story witim pikinini? Datfala magasin hem sei staka taem “hem no for story bat hem taem for kwestinim olketa pikinini wea mekem olketa feel nogud: Skul hem hao? Waswe long olketa fren bilong iu?” Then magasin hia ask olsem moa: “Hao nao bae olketa pikinini bilong iumi lanem hao for garem gudfala wei for fren?”

From wei for story gud hem no savve happen seleva, hao nao bae iumi kamap moabeta long hem? Important advaes from Christian disaepol James for iumi hem olsem: “Evri man mas kwiktaem for lisin, slow for toktok, slow for kros.” (James 1:19) So, for garem kaen story wea savve strongim man, iumi mas lisin gud, no katem story or tingse iumi savve full story and talem tingting bilong iumi bifor narawan finisim story bilong hem. No talem kaen toktok wea minim narawan hem rong bikos diswan hem savve spoelem story. Jesus no askem olketa kwestin wea savve mekem man feel nogud, bat hem askem olketa kwestin for muvim man for talemaot tru feeling bilong hem and for strongim wei wea olketa fren.—Proverbs 20:5; Matthew 16:13-17; 17:24-27.

Olketa nambawan principle bilong Bible bae teachim iu for story witim famili bilong iu. Datwan bae mekem gudfala wei for fren for kamap wea bae stap for longfala taem—maet for full laef tu.