Wei for Luk Aotem Peace Long Mind
ALBERT garem hapi marit witim tufala naes pikinini. Bat hem nating feel satisfae long laef bilong hem. Taem hem stragol for faendem waka for selen, hem join insaed long politik and acceptim olketa idea bilong socialism. Hem kamap strong member bilong Communist grup long area bilong hem tu.
Bat gogo, Albert lusim wei for trustim Communism. Hem finis evribit from politik and iusim full strong bilong hem for famili bilong hem. Main goal long laef bilong hem for mekem famili hapi. Nomata olsem, Albert hem still no satisfae; hem no garem peace long mind.
Samting wea kasem Albert hem kasem staka pipol tu. Staka million pipol laek for faendem reason why iumi laef, so olketa interest long olketa difren biliv, idea, and religion. Long olketa year bilong 1960, young pipol long olketa kantri olsem Europe and America rejectim olketa standard bilong community. Olketa hia luk aotem hapi and reason for why iumi laef thru long olketa nogud drug and olketa idea bilong olketa savveman and bigman bilong lotu. Nomata olsem, olketa no kasem trufala hapi. Bat, hem mekem pipol depend long drug and duim dirty fasin, wea mekem standard bilong pipol long world kamap moa worse.
For staka handred year, plande pipol aftarem riches, paoa, or education from olketa tingse olketa samting hia nao bae mekem olketa hapi. Bat, olketa samting hia no mekem olketa hapi. Jesus hem sei: “Nomata sapos man garem plande samting, laef bilong hem no kam from olketa samting wea hem garem.” (Luke 12:15) Plande taem, wei for aftarem riches savve mekem man no hapi. Bible hem sei: “Olketa wea laekem tumas for kamap rich bae foldaon insaed test and trap and wei for barava wantem olketa samting wea krangge and kosim pain, wea gogo barava spoelem man. From fasin for lovem selen hem start bilong plande nogud samting, and taem samfala waka hard for kasem datfala love olketa . . . mekem olketa seleva for kasem staka trabol.”—1 Timothy 6:9, 10.
So, hao nao man savve garem peace long mind and luksavve why nao iumi laef? Waswe, eni barava wei stap for helpem iumi faendem peace long mind and reason why iumi laef? Ia, wei hem stap. Next article bae showimaot hao ansa hem stap long wei for satisfaem wanfala barava important need wea olketa man nomoa garem.
[Piksa long page 3]
Waswe, wei for aftarem riches, paoa, or education savve helpem iu for garem peace long mind?