“Olketa Nating Brekem Faith”

JESUS CHRIST sei olsem long olketa aposol bilong hem: “Iufala hapi nomoa taem pipol tok spoelem iufala and persecutim iufala and talem laea samting wea barava nogud againstim iufala bikos long mi.” (Matthew 5:11) Olketa Jehovah’s Witness hapi bikos olketa followim teaching and example bilong Christ for “no part bilong world,” for no tekpart long politik, and for stap faithful long God nomata enikaen samting kamap.—John 17:14; Matthew 4:8-10.

Olketa Jehovah’s Witness no brekem faith taem olketa stap anda Soviet Union wea Estonia part long hem bifor. Toomas Paul, wea hem wanfala Bible savveman and Bible transleita bilong Lutheran Church, hem raet olsem abaotem olketa long buk bilong hem Kirik keset küla (Church in the Middle of the Village): ‘Tu-thri pipol nomoa savve abaotem samting wea happen long early morning long April 1, 1951. Wanfala plan kamap for sendem Olketa Jehovah’s Witness and pipol wea sapotim olketa for go farawe. Olketa arrestim 279 pipol and sendem olketa go long Siberia. Fastaem, olketa kasem chance for no lusim hom or go long prison sapos olketa saenem wanfala pepa wea sei olketa bae no Jehovah’s Witness nao. Namba bilong olketa hia and olketa narawan wea police arrestim finis, hem 353, and samting olsem 171 interest wan wea savve go long meeting bilong Olketa Jehovah’s Witness. Nomata long taem wea olketa stap long Siberia, olketa nating brekem faith. No staka member bilong Lutheran Church long Estonia nao garem kaen faith wea Olketa Jehovah’s Witness garem.’

Olketa Jehovah’s Witness evriwea long world trustim God for helpem olketa for faithful and obeyim hem nomata persecution kamap. Olketa hapi for savve hao olketa bae kasem nambawan reward for faithful fasin bilong olketa.—Matthew 5:12.