Waswe, Iu Savve Ting Daonem Iuseleva Tumas?
FOR longfala taem Lena stragol for deal witim wei wea hem ting daonem hemseleva tumas. Hem sei: “Taem mi pikinini samwan spoelem mi saed long sex for plande year. Diswan spoelem evribit tingting bilong mi abaotem miseleva. Mi feel mi barava iusles.” Simone tu hem ting go bak long taem wea hem young and hem sei: “Insaed long mi, mi nating hapi and mi ting mi no fit.” Luk olsem diskaen feeling mekem plande pipol distaem barava feel sorre tumas. Wanfala organization for helpem olketa pikinini thru long telephone, sei klosap haf long olketa teenager wea ringim olketa savve sei ‘olketa evritaem feel olketa no fit.’
Samfala savveman and doctor sei wei for ting daonem seleva hem kamap taem narawan mekem man feel iusles. Kaen tingting olsem savve kamap sapos samwan tok daonem narawan olowe, ova tumas for hotem hem, or spoelem hem long eni wei. Nomata wanem nao mekem diswan kamap, hem savve mekem man wikdaon and savve barava spoelem hem evribit. No longtaem go nomoa research bilong medical showimaot hao olketa wea ting daonem seleva no trustim olketa seleva and narawan tu. Taem olsem, olketa spoelem nao wei wea olketa fren gud witim narawan. Datfala report hem sei, ‘Gogo, olketa seleva nao duim samting wea lead go long samting wea olketa no laekem for happen.’
Pipol wea feel olsem, plande taem safa from samting wea Bible kolem “tingting for wari.” (Psalm 94:19) Olketa tingse hard for olketa duim eni gud samting. Sapos eni samting hem nogud, olketa tingse olketa nao garem blame for datwan. Nomata eniwan praisem olketa for samting wea olketa duim, olketa feel olsem olketa no really duim samting wea mekem olketa fit for kasem praise, and hao gogo pipol bae luksavve long datwan. From olketa tingse olketa shud no hapi, plande spoelem olketa seleva, and then olketa tingse hem hard nao for olketa winim disfala wei for spoelem seleva. Lena, wea iumi storyim finis, hem spoelem hemseleva thru long wei for no balance saed long kaikai. Hem duim diswan bikos hem ting daonem hemseleva tumas, and hem sei, “Mi tingse mi hard for change nao.”
Waswe, olketa wea garem “tingting for wari” olsem, bae olsem for olowe nao? Waswe, man savve duim eni samting for winim kaen feeling olsem? Bible talem olketa principle and gud advaes wea helpem plande for winim disfala problem. Wanem nao samfala long olketa principle hia, and hao nao diswan helpem olketa hia for hapi? Next article nao bae storyim diswan.