Reward for Longfala Gogo

LONG Democratic Republic of Congo tufala sista wea born long wan mami and dadi disaed for attendim “Givim God Glory” Distrik Convention long Lisala, and datwan hem farawe tumas from hom bilong olketa. For kasem long there, olketa mas go insaed ples wea war hem gohed tu. Tufala hope for kasem gud samting from spiritual instruction and wei for kaban witim olketa Christian brata and sista, and tu, tufala luk forward for meetim olketa wea bae kam from branch office bilong Olketa Jehovah’s Witness long Kinshasa. For staka year nao olketa nating lukim eniwan from branch office bikos long war wea gohed long datfala kantri, so tufala no want for missim datfala chance for meetim olketa.

From hom bilong olketa long Basankusu, go kasem Lisala, hem 300 kilometer. For kasem long there, olketa tekem wanfala kanu, and mas padol followim tufala river and go thru long bush tu. Hem tekem thrifala week for kasem Lisala. From tufala evriwan insaed full-taem ministry, wanfala for 3-fala year, and narawan for 19-fala year, tufala mekius long datfala gogo for talemaot gud nius abaotem Kingdom. Tufala spendem samting olsem 110 hour for preach long olketa wea tufala meetim, and givimaot 200 tract and 30-fala magasin.

Tufala mas padol followim datfala river midolwan long olketa hippopotamus and crocodile wea staka long datfala ples. Long naet, tufala mas no go bikos hem danger tumas for padol followim river taem hem dark! Tufala go thru long olketa ples wea army mas chekim olketa tu.

Nomata disfala gogo hem barava long and mekem man taed, tufala sista hia hapi tumas from tufala duim datwan. Tufala barava tinghae and hapi from tufala stap long datfala convention long Lisala. Heart bilong tufala fulap witim strongfala feeling for truth, and tufala kasem encouragement from wei wea olketa stap witim 7,000 brata and sista wea hipap. Taem convention hem finis, tufala go bak moa followim sem wei, and kasem bak famili bilong olketa wea stap gud and hapi.