“Olketa Savve Kamap Free Stretawe”
GENEVIÈVE DE GAULLE, niece bilong Charles de Gaulle, president bilong France bifor, hem savve long Olketa Jehovah’s Witness long wanfala raf prison bilong olketa Nazi long Ravensbrück, north Germany. Long August 1945, hem raetem toktok antap insaed wanfala leta.
Olketa klosim datfala raf prison long Auschwitz, Poland, long January 27, 1945. Start long 1996, Germany keepim disfala day for rememberim olketa wea safa anda long rul bilong Hitler.
Long January 27, 2003, taem Peter Straub, president bilong State Parliament of Baden-Württemberg givim tok for rememberim olketa hia wea safa, hem sei: “Evriwan wea kasem persecution from biliv saed long religion and politik, and wea willing for dae winim wei for obeyim raf rul bilong Hitler fit for kasem bigfala respect . . . . Only religion wea barava no willing for followim raf rul bilong Hitler hem Olketa Jehovah’s Witness: Olketa nating apim hand bilong olketa for salutim Hitler. Olketa no willing for mekem promis long Hitler and Gavman bilong hem, long sem wei wea olketa no join insaed army and long waka for sapotim army. And olketa pikinini bilong olketa no join long Hitler Youth Muvment.”
Jesus Christ sei olsem abaotem olketa follower bilong hem: “Olketa no part bilong world, olsem mi tu no part bilong world.” (John 17:16) So, reason Olketa Jehovah’s Witness disaed for stand strong hem for saed bilong religion nomoa. Straub gohed for sei: “Olketa Jehovah’s Witness prisoner long datfala raf prison mas werem purple triangle long kaleko bilong olketa. Olketa nomoa pipol wea fit for mekem olketa seleva for kamap free from prison and for no dae. Sapos olketa saenem wanfala pepa for denyim faith bilong olketa, olketa bae kamap free nao.”
Klosap evri Witness nating willing for lusim faith bilong olketa. Dastawe, samting olsem 1,200 Witness dae long taem bilong Nazi rul. Nara tu handred seventi olketa killim dae from olketa no willing for joinim army. Olketa duim samting followim disfala toktok: “Mifala mas obeyim God olsem ruler winim olketa man.”—Acts 5:29.
President bilong State Parliament of North Rhine-Westphalia, Ulrich Schmidt, hem talem hao Olketa Jehovah’s Witness olketa no spesol pipol. Datfala brochure, Landtag Intern, story abaotem tok bilong hem and sei: “Pipol hia olketa olsem iumi nomoa, wea followim conscience bilong olketa, strong for biliv bilong olketa saed long religion, olketa gudfala citizen, and from Christian biliv bilong olketa, olketa no followim olketa idea and goal bilong olketa Nazi.” Iumi sure hao Jehovah hapi long olketa wea barava loyal long hem taem olketa kasem hardfala taem. Iumi readim long Proverbs 27:11: “Kamap wise, son bilong mi, and mekem heart bilong mi hapi, mekem mi givim ansa long wan wea tok daonem mi.”
[Piksa Credit Line long page 30]
Courtesy of United States Holocaust Memorial Museum