Olketa Teacher Praisem Wei for Interest Long Bible

MARIANNA, wanfala Jehovah’s Witness long south Italy hem 18 year, and hem long last year bilong hem long hae skul. Hem and samfala nara young Witness go long wanfala skul tugeta.

Marianna raet olsem: “For tu-thri year finis, samfala long mifala savve readim text long Bible from Lukluk Long Olketa Scripture Evriday long brek taem. Only ples mifala savve duim datwan hem long corridor klosap long office bilong olketa teacher. Hem no kwaet tumas. Staka long olketa teacher lukim mifala taem olketa go pas, and samfala stop for lukim wanem nao mifala duim. Evritaem diswan givim chance for mifala for ansarem kwestin bilong olketa. Evriday samting olsem wanfala teacher mas stop for story witim mifala. Samfala bae stap for lisin long story bilong mifala abaotem datfala text from Bible, and olketa praisem wei wea mifala olketa Witness interest long spiritual samting. Wantaem, deputy prinicipal invaetem mifala for duim story bilong mifala insaed office bilong olketa teacher.

“Bihaen teacher bilong mi ting raonem ples wea mifala savve storyim Bible long hem, hem askem principal sapos mifala savve duim insaed wanfala long olketa class rum wea kwaet lelebet. Principal hem letem, and teacher bilong mi praisem mifala front long full class for gudfala example wea mifala showimaot. Mifala evriwan hapi for nambawan privilege wea Jehovah givim mifala.”