Hem God or Hem Man?

“MI NAO laet bilong world. Man wea followim mi bae no wakabaot insaed long darkness, bat bae hem garem laet bilong laef.” (John 8:12) Jesus Christ nao talem toktok hia. Wanfala savveman long first century raet olsem abaotem hem: “Evri nambawan samting bilong wisdom and savve hem stap haed long hem.” (Colossians 2:3) And tu, Bible sei olsem: “For kasem laef olowe, olketa mas kasem savve abaotem iu, datfala only tru God, and abaotem datwan wea iu sendem kam, Jesus Christ.” (John 17:3) Stretfala savve abaotem Jesus hem important for mekem iumi kasem wanem iumi needim long spiritual wei.

Staka pipol raonem world savve long story abaotem Jesus Christ. Hem affectim history bilong olketa man long barava bigfala wei. Tru nao, staka iusim kalenda wea pipol wakem followim year wea olketa tingse Jesus hem born. The World Book Encyclopedia sei olsem: “Staka pipol kolem olketa date bifor datfala year B.C., or bifor Christ, . . . olketa kolem olketa date bihaen datfala year A.D., or anno Domini (insaed long year bilong Lord bilong iumi).”

Nomata olsem, olketa didifren idea kamap abaotem hu nao Jesus. Samfala ting hem wanfala man nomoa wea duim samting wea affectim history bilong olketa man long bigfala wei. Bat, olketa narawan worshipim hem olsem Olmaeti God. Samfala Hindu sei Jesus Christ hem olsem Hindu god Krishna, wea plande pipol sei hem wanfala god wea kam long earth and kamap olsem man. Waswe, Jesus hem wanfala man nomoa, or hem samwan wea pipol fit for worshipim? Really, hu nao hem? Wea nao hem kam from? Fasin bilong hem hao? And distaem hem long wea? Buk wea talem staka samting abaotem Jesus bae givim olketa trufala ansa for olketa kwestin hia, long nextfala article.