Help for Bossim Feeling Bilong Iumi

WASWE, olketa nogud feeling samfala taem bossim iu? Waswe, iu man wea savve kwiktaem feel nogud and kros? Waswe, olketa wari bilong laef big tumas? Wanem nao bae helpem iu?

Hem normal samting nomoa for evri man kasem olketa gud and nogud feeling. Taem man bossim datwan laef hem kamap gud. Nomata olsem, Bible talem stret hao “hardfala living savve mekem wise wan duim krangge samting.” (Ecclesiastes 7:7) From raf fasin and accident kamap big tumas long world, diswan affectim feeling bilong iumi evriwan. Bat Bible sei tu: “No eniting hem gud moa, bat man shud hapi long olketa waka bilong hem.” (Ecclesiastes 3:22) Dastawe, for iumi enjoyim laef, iumi mas lane and hapi for mekem grow olketa gudfala feeling. Hao nao iumi savve mekem grow olketa gudfala feeling and daonem olketa nogud feeling?

Plande taem, for duim samfala samting savve daonem olketa nogud feeling bilong iumi. Olsem example, taem iumi no savve kontrolem olketa samting wea happen, hem gud for iumi duim samting winim wei for wari abaotem datwan. Olketa samting olsem for go wakabaot, lisin long naesfala music, duim exercise or for helpem samwan wea garem need, maet help lelebet and mekem iumi hapi.—Acts 20:35.

Bat nambawan wei for daonem olketa nogud tingting hem for trustim Creator. Taem nogud tingting kamap, iumi need for prea and ‘torowem evri wari bilong iumi long God.’ (1 Peter 5:6, 7) Bible encouragem iumi: “Jehovah hem stap klosap long olketa wea heart bilong olketa brek . . . Staka trabol kasem man wea raeteous, bat Jehovah sevem hem from trabol hia.” (Psalm 34:18, 19) Hao nao iumi sure God savve kamap ‘man for help and provaedem sef ples’ for iumi? (Psalm 40:17) Hem nao for studyim Bible and ting raonem olketa Bible example wea showimaot God interest long olketa servant bilong hem.