Waswe, Iu “Rich Saed Long God”?

WANFALA long olketa parabol bilong Jesus Christ wea mekem man tingting, hem abaotem wanfala rich landowner. Datfala landowner plan for buildim olketa big stoahaos, mekem hem garem staka samting for hemseleva long future. Bat long tokpiksa bilong Jesus, hem wanfala “krangge man.” (Luke 12:16-21) Samfala Bible transleison iusim datfala word, “stupid.” Why nao olsem?

Diswan hem bikos disfala rich man nating tingim God taem hem mekem olketa plan bilong hem, and hem nating praisem God for wei wea land hem barava gud. (Matthew 5:45) Bat, hem tok praod olsem: “Soul, iu garem plande gudfala samting wea fitim staka year; garem isi living, kaikai, drink, stap hapi nao.” Tru nao, hem tingse olketa samting wea hem kasem from hard waka bilong hem savve kamap ‘olsem wall for protectim hem.’—Proverbs 18:11.

Disaepol James givim warning againstim kaen praod tingting taem hem raet olsem: “Kam, distaem, iufala wea sei: ‘Tuday or tumoro bae iumi go long disfala taon and iumi bae stap long there for wanfala year, and iumi bae duim bisnis and kasem bak staka selen,’ bat iufala no savve wanem nao bae happen tumoro. From iufala olsem smoke wea stap for lelebet taem and then lus nao.”—James 4:13, 14.

Olketa samting wea James talem kamap tru, bikos God sei long datfala rich man long parabol bilong Jesus: “Krangge man, long disfala naet bae iu lusim soul bilong iu. So hu nao bae kasem evri samting wea iu hipimap?” Rich man hia bae dae, olsem smoke wea stap lelebet taem then hem lus nao, bifor hem savve lukim olketa samting wea hem planim long mind bilong hem kamap tru. Waswe, iumi minim disfala leson? Jesus sei: “Bae hem semsem tu witim man wea hipimap olketa rich samting for hemseleva bat hem no rich saed long God.” Waswe, iu “rich saed long God”?