“Olketa wea Go Daon Long Sea Insaed Olketa Ship”

WANFALA bronze statue bilong wanfala kapten wea steerim ship bilong hem insaed big wind, hem standap feisim harbor long Gloucester, Massachusetts, U.S.A. Datfala statue hem for rememberim tu-thri thousand fisherman long Gloucester wea dae insaed sea. Olketa toktok bilong Psalm 107:23, 24 stap long blok wea datfala statue standap long hem and long narafala saen saed long hem, wea sei: “Olketa wea go daon long sea insaed olketa ship, wea duim bisnis insaed long barava deep wata; olketa hia lukim olketa waka bilong Lord, and olketa nambawan samting bilong hem long deep sea.”—King James Version.

For fishing long area wea garem staka fish long Atlantic Sea, hem wanfala bisnis wea danger. Long olketa year wea go pas finis, samting olsem 5,368 man from Gloucester, wea population bilong hem maet 30,000 pipol distaem, dae insaed long sea taem olketa fishing. Raeting wea stap long datfala memorial hem sei: “Seknomoa strongfala wind and bigfala wave bilong northeast wind killim dae samfala man. Samfala dae seleva nomoa insaed smol kanu wea drift go farawe from ship wea tekem olketa go for fishing long datfala area. Samfala ship bangam each other insaed big wind and sink daon. Samfala moa, olketa big steamer nao bangam olketa long road bilong olketa big ship.”

Datfala memorial hem showimaot sorre bilong pipol for hard waka and danger wea olketa fisherman feisim for staka handred year finis. Tingim olketa wea krae and sorre for hasband, dadi, brata, and son bilong olketa wea lusim laef long sea. Bat, nomata olsem, Jehovah God nating forgetim olketa widow, olketa pikinini wea no garem dadi, and olketa wea dae insaed long sea tu. Aposol John talem samting wea bae happen long future: “Sea givim kam olketa wea dae insaed long hem, and dae and Hades givim kam olketa wea dae insaed long olketa.” (Revelation 20:13) Olketa wea go “daon long sea insaed olketa ship” bae barava lukim olketa nambawan “waka bilong Lord” taem olketa resurrect.