Gud Nius for Pipol Bilong Evri Nation

BUKLET long piksa antap hem release long “Wakabaot Witim God” Distrik Convention bilong Olketa Jehovah’s Witness long 2004/05. Wanfala edition long disfala buklet hem garem 32 page and wanfala short story wea stap long 29-fala languis wea first wan hem Bicol and last wan hem Wallisian, and olketa wakem disfala buklet long wei for mekem staka pipol fit for herem gud nius bilong Kingdom. (Matthew 24:14) Olketa story long daon hem experience abaotem taem olketa iusim disfala buklet.

• Bihaen wanfala Witness famili kasem disfala buklet long wanfala convention, olketa go long thrifala area wea pipol savve wakabaot and relax long hem. Olketa meetim pipol from India, Netherlands, Pakistan, and Philippines long datfala ples. Dadi bilong olketa sei: “Nomata olketa pipol hia savve long English, olketa hapi tumas for lukim story long languis bilong olketa seleva, bikos olketa stap farawe tumas from hom bilong olketa. Diswan mekem olketa luksavve waka bilong iumi hem kamap evriwea long world and wei wea iumi wan mind.”

• Wanfala Witness showim datfala buklet long wanfala man from India wea olketa waka tugeta. Datfala man hapi tumas for lukim evri languis insaed and readim story long languis bilong hemseleva. Diswan mekem interest for story abaotem Bible hem kamap big. Wanfala from Philippines wea olketa waka tugeta tu, hem barava sapraes for lukim languis bilong hem insaed datfala buklet and hem interest for savve moa abaotem Olketa Jehovah’s Witness.

• Long Canada, wanfala woman from Nepal agree for studyim Bible witim wanfala Witness thru long telephone bat hem hol bak for letem datfala sista for kam long haos bilong hem. Bat taem datfala Witness storyim datfala buklet wea garem wanfala story long Nepali languis, hem hapi and invaetem datfala sista for kam long haos. Hem mas lukim datfala story long languis bilong hemseleva! Start long datfala taem Bible study hem gohed long haos bilong woman hia.